Kişi həndbolçular arasında ölkə çempionatında pley-off mərhələsinin ikinci oyunları keçirilib.Azərbaycan Həndbol Federasiyasından bildirilib ki, günün mərkəzi matçında “Bakı” komandası ilə “Təhsil” kollektivi üz-üzə gəlib. Gərgin idman mübarizəsi şəraitində keçən görüş paytaxtın eyniadlı təmsilçisinin 34:33 hesablı qələbəsi ilə yekunlaşıb.
Günün digər oyununda “Məhsul” həndbolçuları Respublika İxtisaslaşdırılmış Olimpiya Ehtiyatları Uşaq Gənclər İdman Məktəbinin (RİOEUGİM) yetirmələrini çətinlik çəkmədən məğlub ediblər - 33:24.
Xatırladaq ki, ilk mərhələnin oyunlarında “Bakı” klubu “Təhsil” kollektivində 37:34, “Məhsul” həndbolçuları isə RİOEUGİM-in komandasından 36:30 hesabı ilə üstün olub.
Pley-off mərhələsinin üçüncü görüşləri aprelin 15-də keçiriləcək.
Pley-off mərhələsinin son oyunlarında “Məhsul” RİOEUGİM-i, “Bakı” isə “Təhsil”i nominal ev sahibi kimi qəbul edəcək.