3 mart -1 aprel tarixlərində Amerika Birləşmiş Ştatlarının Filadelfiya şəhərində Beynəlxalq şahmat turniri keçirilib
Turnirdə 15 ölkədən 100-dək şahmatçı mübarizə aparıb. Ölkəmizi bu yarışmada Ümid Aslanov təmsil edib.
7 oyuna çıxan Ümid bu qarşılaşmaların 5-də qələbə qazanıb, bir heç-heçə və 1 məğlubiyyətlə turnirin üçünçüsü olub.
Ümidin hələ 12 yaşı var. Amma əldə etdiyi uğurlar çox böyükdür. Necə deyərlər, yaşından da, başından da... 2006-cı ildə Xırdalan şəhərində anadan olan Ümid Aslanov 5 yaşından şahmat oynamağa başlayıb. Şahmata olan həvəsi atası ilə babasının evdə şahmat oynaması ilə yaranıb. Şahmat fiqurlarına əvvəlcə oyuncaq kimi baxan balaca Ümid sonradan bu böyük oyunun sirlərini öyrənməyə maraq göstərib. Və həmin sirləri atasından öyrənməyə başlayıb.
Atası Fuad Aslanov Ümiddə şahmata olan marağı çox tez hiss edib. Bundan sonra Ümidin şahmata olan marağı artıq onun kiçik yaşda böyük istedadının ortaya çıxmasına səbəb olub.
Hələ 5 yaşından etibarən Azərbaycanda keçirlən turnirlərdə və çempionatlarda birinic yerləri tutan Ümid 6 yaşından başlayaraq beynəlxalq yarışlara da qatılıb.
Balaca çempion 2012-ci ildə - 6 yaşında qatıldığı ilk beynəlxalq turnirdən əliboş qayıtmayıb. O, Rumıniyada keçirilən dünya çempionatında yaşıdları arasında birinci yer tutsa da özündən bir yaş böyüklərə məğlub olub. Nəticədə qatıldığı ilk beynəlxalq yarışdaca dünya beşinciliyini əldə edib.
Ümid Gürcüstanda, Yunanistanda, Bolqarıstanda keçirilən beynəlxalq turnirlərdə fəxri kürsünün ən yüksək pillələrinə qalxmağı bacarıb. 2013-cü ildə Serbiyada 7 yaşlılar arasında keçirilən qitə birinciliyində bütün rəqiblərinə qalib gələrək Avropa çempionu olub. Bu uğurunu 2014-cü ildə də təkrar edib.
Ümid hazırda Xırdalan şəhər Şahmat Mərkəzində şahmat dərslərini davam etdirir.
Şamo Əliyev