"Prezident İlham Əliyevin rəhbərliyi altında həyata keçirilən geniş islahatlar paketi çərçivəsində iqtisadi siyasətin prioritet istiqamətləri olan qeyri-neft sektorunun inkişafının sürətləndirilməsi, regionların tarazlı inkişafı, əlverişli biznes və investisiya mühitinin formalaşdırılması və əhalinin rifahının daha da yüksəlməsi nəticəsində ölkənin davamlı sosial-iqtisadi tərəqqisinə nail olunmuş və əvvəlki illərdə olduğu kimi, 2018-ci ildə də inkişaf davam edib".
E.Quliyev bildirib ki, “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrası ölkə iqtisadiyyatının dinamik inkişafında müstəsna rol oynayıb.
Ölkə başçısının proqramın icrasını və regionların inkişafını hər zaman diqqət mərkəzində saxladığını deyən deputat söyləyib ki, Dövlət Proqramı çərçivəsində müxtəlif təyinatlı infrastruktur obyektlərinin və yeni müəssisələrin açılış və təməlqoyma mərasimlərində iştirak edib, innovativ istehsal təyinatlı müəssisələrin fəaliyyəti ilə tanış olub: "Bunlara uyğun olaraq, regionlarda ictimaiyyətin nümayəndələri ilə keçirilmiş görüşlərdə qaldırılmış məsələləri nəzərə alaraq, müvafiq rayonların inkişafı ilə bağlı tədbirlərə əlavə maliyyə vəsaitlərin ayrılması barədə Azərbaycan Respublikasının Prezidenti bir sıra Sərəncamlar imzalayıb, müvafiq tapşırıq və tövsiyələrini verib. Həyata keçirilən məqsədyönlü siyasət nəticəsində 2018-ci ildə 118 min yeni iş yeri və minlərlə müəssisələr açılıb".
E.Quliyev qeyd edib ki, ümumilikdə, 2014-cü ildən ötən müddət ərzində Dövlət Proqramının icrası nəticəsində ölkə üzrə 20 minə yaxın müəssisə fəaliyyətə başlayıb və 938 minə yaxın yeni iş yeri yaradılıb ki, bunun 648 mindən çoxu daimidir: "Aparılan sənayeləşmə siyasəti regionların dinamik inkişafına ciddi təkan verib, iri sənaye parkları, sənaye məhəlləri, aqroparklar yaradılıb. 2014-cü ildən uğurla icra olunan bu proqramlar regionlarda şəhər, qəsəbə və kəndlərin simasını köklü şəkildə dəyişib, regionların potensialının artmasına, infrastruktur təminatının, kommunal xidmətlərin keyfiyyətinin, biznes və investisiya mühitinin yaxşılaşmasına və əhalinin rifahının yüksəlməsinə geniş imkanlar açıb. Hazırda bu imkanlardan istifadə etməklə ölkənin sosial-iqtisadi həyatında, xüsusilə regionlarda, o cümlədən kənd yerlərində iqtisadi inkişafın sürətləndirilməsi, əhalinin layiqli məşğulluğu və sosial rifah halının daha da yüksəldilməsi istiqamətlərində işlərin yeni keyfiyyət müstəvisində aparılması əsas məsələlərdəndir".
Deputat vurğulayıb ki, bu məsələlərin sistemli şəkildə həll olunması ölkənin regionlarında mövcud olan potensialdan daha səmərəli istifadə etməklə bölgələrdə, o cümlədən kənd yerlərində sosial-iqtisadi inkişafın sürətləndirilməsi və bu inkişafın davamlılığının möhkəmləndirilməsini zəruri edir:
"Qeyd olunanlar nəzərə alınaraq, ölkə regionlarının, o cümlədən kənd yerlərinin sosial-iqtisadi inkişafı sahəsində əldə olunan nailiyyətləri daha da artırmaq, ölkədə regionların inkişafı ilə əlaqədar tənzimlənmə sisteminin, o cümlədən qanunvericilik bazasının, institusional və iqtisadi mexanizmlərin daha da təkmilləşdirilməsi, investisiya və innovasiya fəallığının artırılması, mütərəqqi texniki avadanlıqlar və texnologiyaların tətbiqi əsasında yerli iqtisadi potensialın gücləndirilməsi və təsərrüfat dövriyyəsinə tam cəlb olunması, buna uyğun olaraq, iqtisadiyyatın şaxələndirilməsinin genişləndirilməsi və səmərəliliyinin yüksəldilməsi hesabına rəqabətqabiliyyətliliyinin artırılması, sahibkarlığın inkişafı, məhsul və xidmət istehsalı, satışı və istehsal vasitələri bazarında rəqabət mühitinin daha da sağlamlaşdırılması, maliyyə resurslarına və bazara çıxış imkanlarının asanlaşdırılması, istehsal, sosial və bazar infrastrukturunun modernləşdirilməsi,sosial xidmətlərin çeşidinin artırılması, keyfiyyətinin yaxşılaşdırılması və aztəminatlı insanlar üçün əlçatanlığının təmin edilməsi, həssas əhali qruplarının sosial müdafiəsinin gücləndirilməsi, təbii ehtiyatlardan daha da səmərəli istifadə olunması və bu kimi digər istiqamətlərdə kompleks işlərin görülməsi mühüm əhəmiyyət kəsb edir və Sizin də qeyd etdiyizi gözləntilərin əsasını təşkil edir".