Sinəsini düşmən gülləsinə sipər edənlər heç vaxt unudulmurlar Bütün yüksəkliklərdən ucada dayanan bir zirvə var. O, şəhidlikdir. Bu zirvəyə qalxmaq hər insana nəsib olmur. Ancaq gözlərini qırpmadan müqəddəs amallar uğrunda çarpışanlar, ölümün gözünə dik baxaraq vətən və xalq yolunda canından keçənlər bu zirvəyə ucala bilərlər. Necə ki, Ab.eron rayonunda doğulub boya-başa çatmış və torpaqlarımızın bütövlüyü uğrunda canından keçmiş yüzlərlə gənc bu yolu seçməklə şəhidlik zirvəsinə ucalmışdır.
Dağlıq Qarabağ müharibəsi başlayandan indiyədək Abşeron rayonu 198 şəhid vermişdir. Rayonda həmin şəhidlərə böyük ehtiram göstərilməklə onların adlarının əbədiləşdirilməsi üçün müxtəlif tədbirlər həyata keçirilir. Şəhidlərin adlarını əbədiləşdirmək üçün hər birinin adına küçələr verilməklə yanaşı, xatirələrinə bulaq kompleksləri də inşa edilir.
Xırdalan şəhərində şəhid ailələri, müharibə veteranları və əlilləri üçün inşa edilmiş binanın həyətində də Qarabağ uğrunda döyüşlərdə qəhrəmancasına həlak olmuş şəhidlərin xatirəsini əbədiləşdirmək məqsədi ilə "Şəhidlər bulağı" kompleksi tikilir.
Abşeron Rayon İcra Hakimiyyətinin başçısı İradə Gülməmmədovanın təşəbbüsü ilə inşa olunan "Şəhidlər bulağı" kompleksində artıq son tamamlanma işləri aparılır.
Şamo Əliyev