Abşeron rayonunun ərazisində yerləşən “Yanardağ” Dövlət Tarix-Mədəniyyət və Təbiət Qoruğunda keçirilən festival Abşeron rayon İcra hakimiyyəti və Abşeron rayon Mədəniyyət Mərkəzinin birgə dəstəyi ilə təşkil olunub.
Abşeron rayon icra hakimiyyəti başçısının müavini Fuad Cəbrayılovun, rayonun Məhəmmədi, Digah kənd sakinlərinin və turistlərin iştirak etdiyi festivalda Gürcüstan respublikasının , o cümlədən, Abşeron rayon Mədəniyyət Mərkəzinin, Xırdalan şəhər Onbirillik Musiqi Məktəbinin, Qobu qəsəbə Uşaq İncəsənət məktəbinin və Novxanı kənd Sənətkarlıq klubunun kollektivləri bir-birindən maraqlı rəqs kompozisiyaları nümayiş etdiriblər.
Sonra festival iştirakçıları diplom və xatirə hədiyyələri ilə mükafatlandırılıblar.
Sonda Rayon Mədəniyyət Mərkəzinin direktoru Arif Vəliyev çıxış edərək göstərdiyi dəstəyə görə Abşeron Rayon İcra Hakimiyyətinə təşəkkürünü bildirib. Qeyd olunub ki, festival ölkəmizin tarixi irsi, mədəniyyəti, milli adət-ənənələri, xalq yaradıcılığı və folklorunu dərindən öyrənmək, mədəni irsin uşaq və gənclər arasında daha da geniş təbliğ etmək, rəqslərimizi müasir tələblər səviyyəsində tanıtmaq, xoreoqrafiya sənətini daha da inkişaf etdirmək, eyni zamanda ölkəmizə gələn festival iştirakçılarına Azərbaycanı tanıtmaq məqsədi ilə təşkil olunur.