Novruz bayramı ilə əlaqədar Abşeronun məktəb və uşaq bağçalarında bir sıra bayram tədbirləri düzənlənir.
Bayram şənliklərindən biri də Xırdalan şəhər 26 saylı körpələr evi-uşaq bağçasında keçirildi.
Biz də bayram şənliyinin necə keçirildiyini görmək üçün adıçəkilən bağçaya yollandıq. Bağçaya daxil olarkən əsl bayram əhval-ruhiyyəsini hiss etdik. Bayram libaslarında olan uşaqlar böyük sevinclə öz çıxışlarını gözləyirdilər.
Qonaqların və valideynlərin də iştirakı ilə keçirilən şənlikdə balacalar çıxışlarına öncə Novruz mahnısı ilə başladılar.Tədbiri giriş sözü ilə açan bağçanın müdirəsi Nigar Səfərova "Yel çərşənbəsi" münasibətilə qonaqları, valideyinlər və bağçanın kolektivini təbrik etdi. Novruz bayramı haqqında məlumat verən bağçanın rəhbəri bu gözəl yaz günlərində xalqımıza əmin amanlıq, sülh, bol ruzi, sağlamlıq və xöşbəxtlik arzuladı.
Daha sonra uşaqlar hazırladıqları bayram şeirlərini sıra ilə qonaqlara söylədilər, bir-birindən gözəl rəqslər də nümayiş etdirdilər. Balaca Bahar qızının rəqsi və şeiri isə bayrama daha da gözəllik gətirdi. Şənliyin sonuna yaxın isə zala Novruzun simvolları olan Kosa və Keçəl təşrif buyurdular. Onların gəlişi isə uşaqların sevincini daha da artırdı. Kosa və Keçəlin məzəli söhbətləri, uşaqlarla oyunları bayramı daha da maraqlı etdi.
Balaca fidanların hazırladıqları səhnəciklər maraqlı nümayiş edildi. Milli geyimdə olan balacalar rəqs edərək, baharın gəlişinə aid mahnılar oxudular.
Şamo Əliyev
