Bu gün Daxili işlər nazirinin müavini - Daxili Qoşunların komandanı, general-mayor Şahin Məmmədov qoşunların Bərdə rayonundakı “N” saylı hərbi hissəsində olub.
“Xezerxeber.com” xəbər verir ki, Daxili Qoşunların mətbuat xidmətindən bildiriblər ki, səfərin məqsədi 2014-cü ildə qarşıya qoyulmuş xidməti-döyüş tapşırıqlarının yerinə yetirilməsinə hazırlığın səviyyəsinin yoxlanılması olub.
General-mayor Şahin Məmmədov hərbi hissənin bütün xidmət sahələri, eləcə də şəxsi heyətin kazarma-məişət şəraiti və təminat-təhcizatı ilə yaxından tanış olub. Hərbi hissənin komandiri bütün xidmət sahələri və döyüş hazırlığının vəziyyəti, o cümlədən şəxsi heyətin mənəvi-psixoloji durumu barədə geniş məruzə edib.
O qeyd etdi ki, yüksək döyüş qabiliyyətinə malik hərbi hissənin şəxsi heyətinin fiziki hazırlığı, sağlamlıq durumu, həmçinin mənəvi-psixoloji vəziyyəti tələb olunan səviyyədədir. Sonra kəskin qarlı və şaxtalı hava şəraitinə baxmayaraq, hərbi hissədə real şəraitə uyğun xüsusi-taktiki təlim nümayiş etdirilib.
Təlimi izləyən Daxili Qoşunların komandanı şəxsi heyətin hazırlığını yüksək qiymətləndirərək zabit və gizirlərin peşəkarlığını xüsusilə vurğulamış, peşə vərdişlərinin artırılması istiqamətində səylərin daha da artırılmasının vacibliyini bildirmişdir. O, həmçinin hərbi hissənin coğrafi-strateji mövqeyini vurğulayaraq, hərbi hissənin daim yüksək döyüş hazırlığına gətirilməsinin vacibliyini qeyd etmiş, bunun diqqətdə saxlanılması barədə tapşırıqlar verdi.
General-mayor Ş.Məmmədov digər hərbi hissələrdə olduğu kimi, bu dəfə də hərbi hissənin zabitləri, gizirləri və əsgər valideynləri ilə fərdi qaydada görüşmüş, onların müraciətlərini dinləmişdir. Qaldırılan məsələlərin nəzarətdə saxlanılması, həlli mümkün olanların isə dərhal yerinə yetirilməsi istiqamətində müvafiq göstərişlər verdi.
