Azərbaycan Respublikası Ekologiya və Təbii Sərvətlər Nazirliyindən verilən xəbərə görə, “Beynəlxalq dəniz günü” və “Xəzər həftəsi” çərçivəsində Ekologiya və Təbii Sərvətlər Nazirliyi əməkdaşlarının və könüllülərin iştirakı ilə Xəzər dənizinin Novxanı sahilinin bir hissəsində iməcilik keçirilib.
Aksiyada 3 hektardan artıq sahil zolağı plastik və məişət tullantılarından təmizlənib. ETSN tərəfindən belə maarifləndirici aksiyalar digər Xəzər sahili zonalarda da təşkil edilib. Xatırladaq ki, “Beynəlxalq Dəniz günü” dünya ictimaiyyətinin diqqətini su hövzələrinin və onun bioresurslarının qorunmasına yönəltmək məqsədilə 1978-ci ildə Birləşmiş Millətlər Təşkilatının qəbul etdiyi qərarla təsdiqlənib. Həmin ildən etibarən hər il sentyabr ayının sonuncu həftəsi “Beynəlxalq Dəniz günü” kimi qeyd olunur.