Məişət tullantılarının idarə olunmasının təkmilləşdirilməsi istiqamətində görülən işlər yaxın gələcəkdə bu sahədə nümunəvi şəraitin yaradılacağından xəbər verir. Bu isə geniş mənada ekologiyanın təmizlənməsinə, məişət tullantılarının isə gəlir mənbəyinə çevrilməsinə səbəb olacaq...
Bərk məişət tullantılarının idarəçiliyinə dair Milli Strategiya çərçivəsində Abşeron sanitar poliqonu üzrə Ətraf Mühitə Təsirinin Qiymətləndirilməsi sənədi hazırlanır. Abşeron Rayonu İcra Hakimiyyətiin təşkilatçılığı ilə bərk məişət tullantılarının idarəçiliyinə dair Milli Strategiya çərçivəsində Abşeron sanitar poliqonu üzrə hazırlanan Ətraf Mühitə Təsirinin Qiymətləndirilməsi sənədi üzrə ictimai dinləmələr keçirilib.
Rayonun Aşağı Güzdək qəsəbəsində düzənlənən dinləmələrdə Abşeron Rayon İcra Hakimiyyətinin, İqtisadiyyat Nazirliyinin nümayəndələri, qeyri-hökumət təşkilatları və rayon sakinləri iştirak ediblər.
Lahiyənin rəhbəri Abdurrahim Tan Milli Strategiya və ölkədə bərk məişət tullantılarının idarə edilməsi haqqında ətraflı məlumat verib. Vurğulanıb ki, hazırlanan Milli Strategiya bütün ölkə ərazisində bərk məişət tullantılarının idarə edilməsi üzrə toplanma, daşınma və zərərsizləşdirmə sisteminin təkmilləşdirilməsinə, səmərəliliyin artırılmasına, əlavə xammal bazarının formalaşdırılmasına, təkrar emal sahələrinin qurulmasına, təkrar istehsal sahəsində maraqlı olan potensial sahibkarlar və investorlar üçün əlverişli şəraitin yaradılmasına imkan verəcək. Eləcə də, dövlət büdcəsindən sahəyə ayrılan subsidiyaların tədricən azaldılması, göstərilən xidmətlərin müqabilində alınan ödənişlərin yığım səviyyəsinin artırılması istiqamətində aparılan işlərin daha da sürətləndirilməsi mümkün olacaq.
Bildirilib ki, poliqon üç mərhələdə tikiləcək. İlk mərhələ 2022-ci ilin sonunadək başa çatacaq. İkinci mərhələ 2029-cu, sonuncu mərhələ isə 2036-cı ili əhatə edəcək.
Şamo Əliyev