“İstedadlı Əlillər” İtimai Birliyi tərəfindən Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi və Abşeron RİH-nin təşkilatı dəstəyi ilə reallaşdırılan “Fiziki məhdudiyyəti olan istedadlı şəxslərin yaradıcılıq imkanlarının inkişaf etdirilməsi və cəmiyyətə inteqrasiyası” layihəsinin yekun hesabatını əhatə edən mətbuat konfransı keçirilib. Konfransda birliyin sədri Cavad Qasımov layihənin əhəmiyyətindən danışaraq geniş məruzə ilə çıxış edib. O, qeyd edib ki, birlik layihə çərçivəsində əlilliyi olan insanların hüquqlarının müdafiəsi ilə əlaqədar olaraq həm fərdi, həm də ümumi olaraq bir çox işlər görüb. Belə ki, fərdi olaraq birliyə müraciət edən insanlara hüquqi və sosial yardımın təyin olunması, əlilliyin təyin edilməsi, müalicə, istirahətə göndərilmə və s. məsələlərlə əlaqəli dəstək verilib. Onun sözlərinə görə, ümumi olaraq əlilliyi olan insanların müasir reabilitasiya avadanlıqları ilə təmin edilməsi mövzularında bir çox təkliflərlə aidiyatı təşkilatlara müraciətlər edilib. Eyni zamanda birlik tərəfindən əlilliyi olan insanlar, şəhid və imkansız ailələlərin üzvləri üçün ödənişsiz olaraq İngilis dili və Rus dili kursları keçirilib. Əlilliyi olan istedadlı şəxslərin çoxsaylı sərgiləri, konsertləri təşkil edilib və istedadlı yazarların kitabları nəşr olunub.
Sonda layihə çərçivəsində nəşr olunan 1-ci qrup Qarabağ qazisi Elşad İbrahimovun “Yurdum məni Kəlbəcərdə gözləyir” adlı şerlər kitabının təqdimatı keçirilib.
