Mehdiabad qəsəbə 4 nömrəli tam orta məktəbdə dövlət müstəqilliyinin 25-ci ildönümünə həsr olunmuş "İşıqlı gələcəyə inamla aparan yol" adlı bayram tədbiri keçirilib. Tədbirdə məktəb rəhbərliyi, pedaqoji kollektiv və şagirdlər iştirak ediblər.
Dövlət himninin səsləndirilməsi ilə başlayan tədbir Dövlət bayrağının səhnəyə gətirilməsi ilə açıq elan edilib. Daha sonra tədbir iştirakçılarına Azərbaycanın müstəqillik qazandığı dönəmdəki tarixi hadisələrdən bəhs edən video çarx nümayiş etdirilib.
Tədbirdə çıxış edən məktəb direktoru Elnurə Cavadzadə Azərbaycanın dövlət müstəqilliyini bərpa etməsinin tarixi əhəmiyyətindən danışıb, müstəqil Azərbaycanın keçdiyi şərəfli yoldan, ulu öndər Heydər Əliyevin və onun siyasi davamçısı Prezident İlham Əliyevin rəhbərliyi ilə qazanılan uğurlardan, ölkəmizin inkişafı istiqamətində görülən işlərdən bəhs edib. Müstəqillik Aktının qəbul edilməsinin tarixinə qısa nəzər salan məktəbin direktoru tədbir iştirakçılarını əlamətdar gün münasibətilə təbrik edib. “Ötən əsrin əvvəllərində müstəqilliyini elan edən Azərbaycan çox keçmədən onu itirsə də, 1990-cı illərdə yenidən istiqlalına qovuşub”, - deyən E.Cavadzadə bildirib ki, gənc müstəqil respublikamız ilk illərdə dərin siyasi və iqtisadi böhranla üzləşdi, erməni işğalı, daxili hərc-mərclik dövlət müstəqilliyini təhlükə altına aldı. Belə ağır məqamda xalq müdrik rəhbəri Heydər Əliyevin simasında xilaskarını tapdı. Məhz Ulu Öndərin hakimiyyətə qayıdışı ilə Azərbaycan müstəqil dövlətçiliyini qoruya bildi, onun şəxsində dünyanın Azərbaycana inamı və etimadı yarandı. Ümummilli Liderin rəhbərliyi ilə davamlı ictimai siyasi sabitlik əldə edildi, ölkədə hüquqi və demokratik dövlət quruculuğuna başlanıldı. Qısa müddətdə dünyanın heç bir ölkəsinin nail ola bilmədiyi uğurlar qazanıldı və Azərbaycan sivil dünyaya inteqrasiya etdi.
Çıxışlarda Heydər Əliyevin siyasi xəttinin Prezident İlham Əliyev tərəfindən uğurla davam etdirilməsi, Azərbaycanın beynəlxalq aləmdə layiqli yer tutması, sosial–iqtisadi inkişaf sahəsində qazanılan nəticələr xüsusi vurğulanıb.
Bayram tədbiri şagirdlərin vətənpərvərlik mövzusunda səsləndirdikləri şeir və mahnılarla davam edib.
