Arif Vəliyev Abşeron rayon Mədəniyyət Mərkəzinə direktor təyin edilib. Fevralın 9-da Xırdalan şəhərindəki Mədəniyyət Mərkəzində direktorun kollektivə təqdim edilməsi ilə bağlı tədbir keçirildi.
Tədbirdə çıxış edən Sumqayıt Regional Mədəniyyət və Turizm idarəsinin rəisi Mehman Şükürov dövlətin hər zaman mədəniyyət və incəsənət xadimlərinə diqqət və qayğı ilə yanaşdığını dedi. Bildirdi ki, Prezident İlham Əliyevin və Birinci vitse-prezident Mehriban Əliyevanın səyləri nəticəsində Azərbaycan xalqının mədəni irsi, musiqisi dünyada layiqincə təbliğ olunur. Bir sıra maddi və qeyri-maddi mədəni irs nümunələrimiz UNESCO-nun siyahılarına daxil edilib. İdarə rəisi Mədəniyyət Mərkəzinin gələcək fəaliyyəti ilə bağlı tapşırıq və tövsiyələrini verərək, kollektivə fəaliyyətində uğurlar arzu etdi.
Sonra çıxış edən Sumqayıt Regional Mədəniyyət və Turizm İdarəsinin baş məsləhətçisi İlham Manafov Abşeron rayonunun mədəni həyatından danışdı. Bildirdi ki, Abşeron Azərbaycanın ədəbiyyatına, mədəniyyətinə və incəsənətinə böyük şəxsiyyətlər bəxş edib. Bu ənənə davam etməlidir. Bu işdə uzun illər fəaliyyət göstərən, özünün ənənələri formalaşan rayon Mədəniyyət Mərkəzidə layiqincə fəaliyyət göstərməlidir.
Sonda Arif Vəliyev çıxış edərək ona göstərilən böyük etimada görə minnətdarlığını bildirdi. Qeyd etdi ki, bundan sonrakı fəaliyyətini Abşeron rayon Mədəniyyət Mərkəzinin işinin günün müasir tələbləri səviyyəsində qurulmasına həsr edəcək.
Şamo Əliyev