"Azərbaycan teatrı 2009-2019-cu illərdə" Dövlət Proqramının icrasını təmin etmək məqsədilə Mədəniyyət Nazirliyi, Şəki Şəhər İcra Hakimiyyəti və Azərbaycan Teatr Xadimləri İttifaqının təşkilatı dəstəyi ilə ölkəmizdə “Sərhədsiz teatr” III Şəki Beynəlxalq Teatr Festivalı keçirilir. Festival ümummilli lider Heydər Əliyevin anadan olmasının 95, müsəlman Şərqində ilk parlamentli respublikanın - Azərbaycan Xalq Cümhuriyyətinin yaranmasının 100 və milli peşəkar teatrın yaradılmasının 145 illiyinə həsr edilib.
Festival çərçivəsində mayın 13-də Xırdalandakı Mədəniyyət Mərkəzində C. Cabbarlı adına İrəvan Dövlət Azərbaycan Dram Teatrı abşeronluların qonağı olub. Teatr Cəfər Cabbarlının “Vəfalı Səriyyə” tamaşası ilə çıxış edib.
Tamaşadan öncə Sumqayıt Regional Mədəniyyət İdarəsinin Abşeron rayonu üzrə təmsilçisi Əməkdar Mədəniyyət İşçisi İlham Manafov, İrəvan teatrının direktoru İftixar Piriyev tamaşaçılara festival haqqında məlumat veriblər.
Bildirilib ki, milli və beynəlxalq mərhələ formatında keçirilən festivalda Azərbaycanın 19 teatr kollektivi bir həftə ərzində ölkəmizin 12 şəhərində çıxış edəcək.
Sonra tamaşa nümayiş olunub.
İrəvan teatrın təqdim etdiyi “Vəfalı Səriyyə” tamaşası ailə-məişət mövzusu haqqındadır. Burada bir-birinə səmimi hisslər bəsləyən Səriyyə ilə “student” Rüstəmin məhəbbəti ön planda təsvir olunur. Səriyyənin anası Çimnaz onu qardaşı oğlu qoçu Qurbana ərə vermək istəyir. Dayısı Həmzə də Səriyyənin anası ilə həmfikirdir. Müəllif bu əsərində cəmiyyətdəki ədalətsizlikdən bəhs edir, gördüyü haqsızlıqlara qəzəb və nifrətini bildirirdi. Əsərdə burjua-mülkədar cəmiyyətində hökm sürən nadanlığın, cəhalətin və avamlığın bir-birini təmiz məhəbbətlə sevən gənclərin həyatlarına böyük maneə olduğu göstərilir. Mühafizəkarlığın qulu olan insanlar gənclərin məhəbbətinin qarşısını ala bilmir və sonda onlar bir-birinə qovuşurlar.
Tamaşanın quruluşçu rejissoru Nicat Mirzəzadə, rejissor və musiqi tərtibatı Tural Xəlilzadə, rəssamı Vahid Mürsəliyevdir.
Səhnədə rolları Əməkdar artistlər Vaqif Kərimov, Rəşid Rzayev, aktyorlar Əmrulla Nurullayev, Niyaməddin Səfərəliyev, Şəbnəm Cəbrayılova, Ruhiyyə Eyvazova, Müdvər Nemətova, Rövşən Cəfərov, Natiq Həziyev, Ceyhun Əliyev, Məmməd Zeynalov, Tural Xəlilzadə və Bəhruz Hikmətoğlu ifa ediblər.
Qeyd edək ki, mayın 19-dək davam edəcək festivalda ölkəmizlə yanaşı, İran, Gürcüstan, Meksika, Kolumbiya və Rusiyanın tanınmış teatr kollektivlərinin iştirak edir.
