18 may - Beynəlxalq Muzeylər Günü münasibətilə Abşeron rayon Tarix-Diyarşünaslıq Muzeyində “açıq qapı” elan olunub, “Muzeylər və sabit cəmiyyətin inkişafı” adlı tədbir keçirilib.
Muzeyin qarşısında Azərbaycan xalqının folklor, məişət və sənətkarlığını tərənnüm edən maddi mədəniyyət nümunələrindən ibarət dekorasiya təşkil edilib. Dekorasiya tədbir iştirakçıları tərəfindən xüsusilə maraqla və diqqətlə qarşılanıb.
Tədbirdə həmçinin Xırdalan şəhər 11 illik musiqi məktəbində təhsil alan şagirdlərinin ifalarında musiqi parçaları səslənib.
Muzeyin direktoru Cəmilə Kərimova açılış nitqində bildiribdi ki, Beynəlxalq Muzeylər Şurasının təşəbbüsü ilə 1977-ci ildə təsis olunmuş bu əlamətdar günün məqsədi muzeyləri tanıtmaqdır. Və 1993-cü ildən Azərbaycanda da bu gün qeyd olunur. C.Kərimova Beynəlxalq Muzeylər Şurasının Azərbaycan milli komitəsində 39 muzey, 15 təşkilat, 100 üzvün fəaliyyət göstərdiyini bildirib.
Daha sonra çıxış edənlər bildiriblər ki, Azərbaycanda ilk muzey 1919-cu ilin 7 dekabrında yaradılıb: “İstiqlal muzeyinin açılışı ilə muzey fəaliyyətinin əsası qoyulub. Hazırda isə respublikamızda 200 —də artıq muzey var. Bu sayaq muzeylərin mövcudluğu isə dövlətimizin mədəni irsimizin qorunması və təbliğinə diqqətinin bariz nümunəsidir”.
Beynəlxalq Muzeylər Günü ilə bağlı 16-18 may tarixində Xırdalan şəhərində yerləşən Heydər Əliyev Mərkəzində də “açıq qapı” elan olunub . Azərbaycanda muzey işi və muzey quruculuğunda Heydər Əliyevin rolu mövzusunda mühazirə oxunub. Üç gün davam edən “açıq qapı” aksiyasında Mərkəzə minə yaxın ziyarətçi gəlib.
Şamo Əliyev
