“Sevinc paylaşdıqca çoxalar” deyiblər. Qayğıya ehtiyacı olan insanları yada salmaq, onları sevindirmək insanlığa yaraşacaq ən gözəl addımdır. Yeni Azərbaycan Partiyasının Abşeron rayon təşkilatı Gənclər Birliyinin təşkilatçılığı ilə partiyanın Xırdalan şəhər 9 nömrəli tam orta məktəb üzrə ərazi təşkilatı, Saray 2 saylı sağlamlıq imkanları məhdud uşaqlar üçün Sosial Xidmət Müəssisəsində olub.
Görüşdə müəssisəsinin direktoru Pərvanə Səfərova, Qarabağ Əlil Döyüşçüləri Futbol Federasiyasının Prezidenti Rövşən Quliyev, Federasiyasının vitse prezidenti Elmar Huseynov, YAP Abşeron rayon təşkilatı Gənclər Birliyinin idarə heyətinin üzvləri və rayonun digər fəal gəncləri iştirak ediblər.
P.Səfərova uşaqlara göstərilən diqqət qayğıya görə rayon rəhbərliyinə, Qarabağ Əlil Döyüşçüləri Futbol Federasiyasına, YAP üzvlərinə təşəkkürünü bildirərək bu kimi tədbirlərin yeniyetmələrin yadında uzun müddət qaldığını və onların cəmiyyətə adaptasiyasına müsbət təsir etdiyini qeyd edib.
Balacalara bayram təravəti arzulayan Rövşən Quliyev, Elmar Huseyin və partiyanın Xırdalan şəhər 9 nömrəli tam orta məktəb üzrə ərazi təşkilatının sədri Kamalə Fərəcova isə əlavə ediblər ki, dövlətimizin imkanları genişləndikcə xüsusi qayğıya ehtiyacı olan vətəndaşlara diqqət və qayğı da artır.
Tədbirdə müəssisənin sakinləri sevindirilib, onlara hədiyyələr təqdim edilib.
Qonaqların hədiyyələrindən razı qalan uşaqlar mahnılar səsləndirib, müxtəlif rəqs nömrələrini təqdim ediblər.
Şamo Əliyev
