Xırdalandakı Heydər Əliyev adına mədəniyyət və istirahət parkında mədəni rifahın daha da yüksəldilməsi və yay mövsümündə insanların asudə vaxtlarının səmərəli keçirilməsi məqsədilə Abşeron rayon İcra Hakimiyyətinin təşəbbüsü , Rayon Mədəniyyət Mərkəzinin, Aşıq Şəmşir Mədəniyyət Ocağı İctimai Birliyinin və Azərbaycan Aşıqlar Birliyi Sumqayıt bölməsinin birgə təşkilatçılığı ilə aşıq sənətinin inkişafına həsr olunan “Dostluq körpüsü” adlı konsert proqramı təqdim edilib.
Konsertdə Azərbaycan Aşıqlar Birliyi Sumqayıt bölməsinin sədri Qənirə Mehdixanlı və Rayon Mədəniyyət Mərkəzinin direktoru Arif Vəliyev milli sərvətimiz olan saz sənətinin qorunub saxlanılmasında, gələcək nəsillərə çatdırılmasında görülən genişmiqyaslı işlərdən söz açıblar.
Qeyd edilib ki, Azərbaycan mədəniyyətinə, elminə, sözünə, sazına xidmət göstərmiş Dədə Şəmşir və onun ustadı olmuş Dədə Ələsgər bu gün xalqımızın ürəyində yaşayır.
Tədbirdə Azərbaycan Aşıqlar Birliyi Sumqayıt bölməsinin, Xırdalan, Ceyranbatan, Mehdiabad musiqi məktəblərinin və Rayon Mədəniyyət Mərkəzinin aşıqları çıxış edərək, saz havaları üstündə Dədə Şəmşirin şeirlərini səsləndirib, ustadın yazdığı əsərləri, bir-birindən zəngin saz havaları ifa edərək, tədbirə toplaşanlarda əsl bayram əhval-ruhiyyəsi yaşadıblar.
İki hissədən ibarət olan tədbirdə dekorativ,təsviri və xalq tətbiqi sənət ustalarının iştirakı ilə satış sərgisi də keçirilib.Abşeronlu sənətkarların hazırladıqları müxtəlif əl işləri,fiqurlar sakinlərin böyük marağına səbəb olub.