Abşeron rayon məktəbliləri üçün Azərbaycanda düzənlənəcək Formula-1 yarışları haqqında təqdimat keçirilib. Azərbaycan Respublikasının Prezidenti yanında Bilik Fondu və Bakı Şəhər Halqası Əməliyyat Şirkətinin birgə təşkilatçılığı ilə Xırdalanda yerləşən Heydər Əliyev Mərkəzində baş tutan tədbirdə adıçəkilən fondun Abşeron rayon üzrə nümayəndəsi, əməkdar müəllim Təyyübə Hüseynova çıxış edərək ölkəmizin son illər bir sıra mötəbər yarışlara və müsabiqələrə uğurla ev sahibliyi etməsini ölkəmizin tanınması və beynəlxalq arenada müsbət imicinin möhkəmlənməsi yolunda atılan addım kimi dəyərləndirib.
Sonra Bilik Fondunun Perspektiv inkişaf və layihələrin monitorinqi qrupunun aparıcı məsləhətçisi Almaz Axundova , Fondunun Beynəlxalq Layihələr sektorunun məsləhtçisi Aytən Xubanova, “Formula-1” Avropa Qran-pri yarışlarının təşkilatçısı “Bakı Şəhər Halqası” Əməliyyat Şirkətinin marketinq və kommunikasiya şöbəsinin rəhbəri Nigar Arpadarai, Bakı Şəhər Halqası Əməliyyat Şirkətinin İnsan resursları şöbəsinin rəhbəri İranə Əhmədova və Formula – 1 yarışlarının Bakı Fan Klubunun rəhbəri, f-1.az saytının qurucusu Rəhim Əliyev hazırladıqları təqdimatı iştirakçılara təqdi ediblər.
Təqdimat zamanı Azərbaycanda ilk dəfə keçiriləcək Avropa Qran Prisi haqqında ətraflı məlumat verilib. Oyunlar ərəfəsində çalışacaq “Könüllülər” proqramına qoşulma prosesi və könüllülərin bu proqram vasitəsilə əldə edəcəkləri təcrübə barəsində iştirakçılara geniş məlumatlar təqdim olunub.
Qeyd edilib ki, 21 ölkənin ev sahibliyi etdiyi Formula-1 yarışları içərisində sayca 8-ci Qran Pri olan Bakı Avropa Qran Prisi öz unikallığı ilə digərlərindən seçilir. Yarış boyu avtomobillər dənizkənarı bulvar boyunca hərəkət edəcək və paytaxtımızın qədim incisi olan İçərişəhər tarixi-memarlıq qoruğunun ətrafında dövr edərək televiziya izləyiciləri üçün gözəl mənzərə yaradacaq. Bu görüntülərə Formula-1 yarışlarının 500 milyondan çox olan televiziya tamaşaçısı baxacaq və beləliklə də Azərbaycan paytaxtı dünyanın diqqət mərkəzində olacaq.
Sonra “Bakı Avropa Qran Prisi” (Formula-1) yarışları haqqında videoçarxlar nümayiş edilib.