Xırdalan şəhərində yerləşən 15 saylı körpələr evi- uşaq bağçası 1975-ci ildən fəaliyyət göstərir. Bu illər ərzində minlərlə uşaq bu bağçada tərbiyə almışdır. Hazırda burada 11 qrup – 2 kiçik, 3 orta, 1 rus, 2 böyük və 3 məktəbəhazırlıq qrup fəaliyyət göstərir və həmin qruplarda 210 uşaq tərbiyə alır. Bu il onlardan 55-i ilk dəfə əlinə çanta alıb məktəbə gedəcək .Bu münasibətlə iyunun 20-da tərbiyə ocağında "Əlvida bağça, salam məktəb" adı altında tədbir keçirilib.
Tədbirdə çıxış edən Abşeron rayon İcra Hakimiyyəti başçısının müavini Fuad Cəbrayılov uşaqları məktəbə getmələri münasibəti ilə təbrik edib, onlara gələcək həyatda müvəffəqiyyətlər və ölkəmiz üçün layiqli övlad olmalarını arzulayıb. F. Cəbrayılov ölkə rəhbərliyi tərəfindən respublikamızda təhsil sahəsində aparılan işlər və Abşeron rayonunda həyata keçirilən layihələr barədə ətraflı məlumat verib, bağçanın pedaqoji kollektivinə uğurlar arzulayıb
Bağçanın müdiri Mətanət Novruzova çıxış edərək məktəbəhazırlıq qrupunun uşaqlarını, onların valideynlərini və tərbiyəçilərini məzun günü münasibətilə təbrik edib, bağçada uşaqlar üçün yaradılan şəraitə görə rayon rəhbəri İradə Gülməmmədovaya minnətdarlığını ifadə edib.
Sonra uşaqların ifasında müsiqili-əyləncəli tədbir başlanıb. Fidanlar çıxışları - söylədikləri şeirlər, ifa etdikləri mahnı və rəqslər, göstərdikləri tamaşalarla məktəb təliminə hazır olduqlarını nümayiş etdiriblər.
Tədbirin sonunda 2016-2017 tədris ilində 15 saylı körpələr evi uşaq bağçasında təhsil aldığı müddətdə təlimdə qazandığı uğurlara və qrupun tədbirlərində göstərdiyi fəallığa görə balaca fidanlar fotolarından ibarət albom və tərifnamə ilə təltif olunublar.
Şamo Əliyev
