YAP Abşeron rayon təşkilatının Qadınlar Şurası şəhid ailəsini ziyarət etdi

Əlamətdar bayram günlərində şəhid ailələrinə yardım göstərmək artıq Abşeronda ənənə şəklini alıb. Xeyirxahlıq missiyasına sadiq qalaraq şəhid ailələrinə rayon icra hakimiyyəti tərəfindən bayram sovqatlarının verilməsi onların dövlətin diqqət və qayğısından kənarda qalmadığının bariz nümunəsidir.

Elimizin, obamızın əziz günündə, Novruzun ilk çərşənbəsi – Su çərşənbəsində mənəvi dəyərlərimizə sadiq qalaraq el ağbirçəkləri və şəhid anaları ilə bayramlaşmaq üçün YAP Abşeron rayon təşkilatının Qadınlar Şurasının üzvləri Qobu kəndində olub.

Qonaqlar Şəhidlər kompleksində olub, şəhilər müzeyini ziyarət ediblər.

Muzeylə tanışlıqdan sonra YAP Abşeron rayon təşkilatının Qadınlar Şurasının sədri Təyyubə Hüseynova çıxış edərək dövlətin həmişə şəhid ailələrinin yanında olduğunu və bundan sonra da onların yanında olacağını bildirib. “ Əli öz vətənini, torpağını canından çox sevərək Vətən yolunda şəhid oldu. Dövlət həmişə şəhid ailələrinin qayğıları ilə maraqlanır. Ali Baş komandanımız İlham Əliyev şəxsən şəhid ailələrinin problemləri ilə maraqlanır. Bu gün YAP Abşeron rayon təşkilatının Qadınlar Şurasının və gələn digər yoldaşların bu bayram günündə iştirakı dövlətin şəhidlərinə göstərdiyi münasibətdir. Bütün şəhidlərin əziz ruhu qarşısında baş əyirəm. Allah rəhmət eləsin!”.

Əlinin dəfnində, 40 və il mərasimlərində rayon rəhbəri İradə xanımın şəxsən iştirak etməsi, problemlərimizlə maraqlanması, bizə səbr diləməsi dərdimizi cüzi də olsa yüngülləşdirdi, – deyə şəhid anası Svetlana Heydərova rayon icra hakimiyyəti başçısının diqqətindən, qayğısından danışıb.

Görüşdə bildirilib ki, Əli İntiqam oğlu Heydərov 1997-ci il mayın 10-da Qobuda dünyaya gəlib. Qəsəbə orta məktəbini bitirdikdən sonra həqiqi hərbi xidmətə çağırılıb. Aprel döyüşlərində atıcı-qumbaraatan köməkçisi kimi iştirak edib. Əsgəri olduğu hərbi hissənin döyüşçüləri ilə birlikdə düşmənin layiqli dərsini verən, xalqımıza qələbə sevinci yaşadan oğulların sırasında o da fərqlənib, fəxri fərmanla təltif olunub. Lakin aprel döyüşlərindən sağ çıxsa da, ad gününə iki gün qalmış döyüş tapşırığını yerinə yetirərkən şəhid olub.Ölümündən sonra göstərdiyi qəhrəmanlığa görə Azərbaycan Respublikasının Prezidenti İlham Əliyevin sərəncamı ilə üçüncü dərəcəli “Vətənə xidmətə görə” ordeni ilə təltif edilib.

Sonra bayramı münasibətilə YAP Abşeron rayon təşkilatının Qadınlar Şurasının üzvləri Qobu kəndində məskunlaşmış ahılları ziyarət edib və onlara bayram sovqatlara təqdim ediblər.