Xırdalan şəhərində şəhid Vüsal Salahlının adını daşıyan küçənin və xatirə lövhəsinin açılış mərasimi keçirilib. Xatirə lövhəsinin üzərində şəhidin anadan olduğu və şəhid olduğu tarix əks olunub.
Açılış mərasimində şəhidin yaxınları, döyüş yoldaşları və ictimaiyyət nümayəndələri iştirak ediblər.
Toplantıda çıxış edən Abşeron rayon İcra Hakimiyyəti başçısının müavini Fuad Cəbrayılov şəhid Vüsal Salahlının qəhrəmanlığının gənclərimiz üçün gözəl örnək olduğunu diqqətə çatdırıb. F.Cəbrayılov bu gün qüdrətli Azərbaycan ordusunun öz torpaqlarını hər an azad etməyə hazır olduğunu, dövlət, xalq və ordunun birliyinin sarsılmazlığını vurğulayıb.
Mərasimdə şəhidin atası Şənbə Salahov çıxış edərək övladının xatirəsinə göstərilən ehtirama və şəhid ailələrinə olan diqqət və qayğıya görə Abşeron rayon İcra Hakimiyyətinin başçsı İradə Gülməmmədovaya dərin minnətdarlığını bildirib.
Şəhidin anası Kəbirə Salahova oğlunun anım günündə adını əbədiləşdirdiyi üçün rayon rəhbəri İradə Gülməmmədovaya minnətdarlığını bildirərək, qeyd edib ki, Vətən öz şəhidləri ilə fəxr etdiyi kimi, o da bir ana kimi oğlu ilə qürur duyur və Azərbaycanın bütün torpaqlarının işğaldan tezliklə azad olunmasını arzulayır. O, şəhid anası kimi çıxışını “Azərbaycanın üçrəngli bayrağı Şuşada ucalıb-dalğalanarsa, şəhidlərimizin də ruhu Tanrı dərgahında rahat olar” sözləri ilə bitirib.
Sonra şəhidin yaxınları birlikdə lövhənin üzərindən örtüyü götürüblər. Lövhənin önünə iştirakçılar tərəfindən tər gül dəstələri qoyulub.
Şamo Əliyev
