Xırdalan şəhər Heydər Əliyev Mərkəzində Abşeron rayon icra hakimiyyətinin dəstəyi, rayon Gənclər və İdman İdarəsinin və Demokratik Gənclər” İctimai Birliyinin birgə təşkilatçılığı ilə həyata keçirilən "Dini radikalizmlə mübarizəyə dair dəyirmi masa və təlimlərin təşkili" mövzusunda tədbir keçirildi.
Tədbiri giriş nitqi ilə açan Abşeron rayon Gənclər İdman İdarəsinin rəisi Əsgər Əmirəliyev Prezident cənab İlham Əliyevin rəhbərliyi ilə ölkəmizdə həyata keçirilən uğurlu gənclər siyasətindən bəhs etdi. Məhz bunun bariz nümunəsi kimi Gənclər Fondununun gənclərin layihələrinə hər zaman dəstək verdiyini, gənclərin ideyalarının reallaşdırıldığını söylədi. Ə.Əmirəliyev çıxışında, ölkədə mövcud ənənəvi İslam dəyərlərinin düzgün təbliğinin aparılması istiqamətində görülən işlərdən, xalqımızın multikultural dəyərlərə sadiqlik nümayiş etdirməsindən, dünyəvi və demokratik dövlət olaraq Azərbaycanda dini etiqad azadlığının təmin olunmasından ətraflı danışdı.
Abşeron RİH başçısı aparatının İctimai-siyasi və humanitar məsələlər şöbəsinin müdir müavini - dini qurumlarla işin təşkilatçısı Vüqar Bəşirov, Demokratik Gənclər” İctimai Birliyinin sədri Ramil Süleymanov, Azərbaycan Respublikası Dini Qurumlarla İş üzrə Dövlət Komitəsinin-Abşeron,Sumqayıt Regional İdarəsinin əməkdaşı Ülvü Məmmədov “Demokratik Gənclər” İctimai Birliyinin sədr müavini və layihənin eksperti Təranə İsmayılova çıxış edərək qlobal çağrışlara adekvat cavab vermək, milli maraqlarımızı qətiyyətlə qorumaq, ölkəmizdə sabitliyə təhlükə yarada biləcək bütün amillərə qarşı səmərəli mübarizə aparmaq üçün dövlət və vətəndaş cəmiyyəti institutlarının yaxından əməkdaşlığının vacib olduğunu vurğuladılar.
Çıxışlarda gənclərin radikal mövqe tutan qüvvələrin təsirinə düşməyəcəyinə, əksinə azərbaycançılıq ideyalarının, milli mənəvi və dini dəyərlərin qorunub saxlanmasında mübarizlik nümayiş etdirəcəklərinə əminlik ifadə olundu.
Toplantının sonunda gəncləri maraqlandıran suallara aydınlıq gətirildi.
Şamo Əliyev
