Fövqəladə Hallar Nazirliyinin (FHN) Dövlət Yanğından Mühafizə Xidmətinin təşkilatçılığı və FHN işçiləri Həmkarlar İttifaqının dəstəyi ilə keçirilən yanğın-xilasetmə idmanı üzrə respublika birinciliyinin final yarışına yekun vurulub.
Birincilik FHN-in Dövlət Yanğından Mühafizə Xidməti şəxsi heyətinin peşə və fiziki hazırlıq səviyyəsinin yüksəldilməsi, eləcə də yanğın-xilasetmə idmanının nazirliyin əməkdaşları arasında daha da populyarlaşdırılması, gənclər arasında təbliği məqsədilə təşkil edilib.
Yanğınsöndürən və Xilasedicilərin Beynəlxalq İdman Federasiyası tərəfindən təsdiq olunmuş “Yanğın-xilasetmə idmanının Qaydaları”na uyğun olaraq keçirilən respublika birinciliyində 14 komanda iştirak edib. Komandalar yanğınların söndürülməsində tətbiq edilən müxtəlif döyüş hərəkətləri kompleksindən ibarət olan hücum nərdivanı ilə təlim qülləsinin dördüncü mərtəbəsinə qalxmaq, 100 metrlik maneəli zolağı dəf etmək və döyüş açılışını yerinə yetirməklə güclərini sınayıb.
Döyüş açılışı üzrə mübarizədə Azərbaycan Respublikası Dövlət Neft Şirkətinin obyektləri üzrə Yanğından Mühafizə İdarəsinin 1-ci komandası birinci, Səbail rayon Dövlət Yanğından Mühafizə Hissəsi ikinci, Dövlət Neft Şirkətinin obyektləri üzrə Yanğından Mühafizə İdarəsinin 2-ci komandası isə üçüncü yerə çıxıb.
Hücum nərdivanı ilə təlim qülləsinin dördüncü mərtəbəsinə qalxmaq növü üzrə yarışda Azərbaycan Respublikası Dövlət Neft Şirkətinin obyektləri üzrə Yanğından Mühafizə İdarəsi Dövlət Yanğından Mühafizə Xidmətinin əməkdaşları Asəf İbrahimov birinci, Tural Həzrətquliyev ikinci yerə layiq görülüblər. Nəsimi rayon Dövlət Yanğından Mühafizə Hissəsinin əməkdaşı Seymur Məmmədov isə üçüncü yerlə kifayətlənib.
Yüz metrlik maneəli zolağı dəfetmə növü üzrə yarışın qalibi Azərbaycan Respublikası Dövlət Neft Şirkətinin obyektləri üzrə Yanğından Mühafizə İdarəsi Dövlət Yanğından Mühafizə Xidmətinin əməkdaşı Asəf İbrahimov olub. Nərimanov rayon Dövlət Yanğından Mühafizə Hissəsinin əməkdaşı Qalib Talıblı ikinci, Dövlət Neft Şirkətinin obyektləri üzrə Yanğından Mühafizə İdarəsi Dövlət Yanğından Mühafizə Xidmətinin əməkdaşı Rövşən Heydərov isə üçüncü yerə çıxıb.
Yanğın-xilasetmə idmanı üzrə respublika birinciliyinin komanda üzrə qalibi Azərbaycan Respublikası Dövlət Neft Şirkətinin obyektləri üzrə Yanğından Mühafizə İdarəsinin 1-ci komandası olub. İkinci yerə Azərbaycan Respublikası Dövlət Neft Şirkətinin obyektləri üzrə Yanğından Mühafizə İdarəsinin 2-ci komandası, üçüncü yerə isə Səbail rayon Dövlət Yanğından Mühafizə Hissəsi çıxıb.
Qaliblər FHN işçiləri Həmkarlar İttifaqı və Dövlət Yanğından Mühafizə Xidməti tərəfindən mükafatlandırılıb.