1993-cü ilin 15 iyun tarixi... 27 il keçir. Tarixçilər üçün bu gün, sadəcə, əsrin epoxası, siyasətçilər üçün əhəmiyyətli bir hadisə, vətəndaşlar üçün isə etibar etdiyi və çoxdan gözlədiyi Liderin qayıdışı kimi yadda qalıb. 27 il öncə baş verənlər, sadəcə, təqvimin tarixi olan siyasi hadisə deyil, dövlətimizin yaşamış olduğu inqilabi bir keçid - Heydər Əliyevin hakimiyyətə qayıtmasıdır! Bəlkə illər lazım oldu ki, bu hadisənin əhəmiyyəti müxtəlif təhlillərə əsaslar yaratsın. Lakin o zaman çoxları bu haqda fikirləşmirdi. Çoxları tərəfindən məhz "indi nə etmək mümkündür?" sualına cavab axtarılırdı.
Bu sözləri Absheronxeber-ə açıqlamasında Milli Məclisin deputatı Şahin Seyidzadə deyib.
Deputat bildirib ki, sözügedən tarixdə Heydər Əliyevin hakimiyyətə qayıdışı cəmiyyətdə sabaha əminlik yaratdı. Əksəriyyətimiz o illəri yaxşı xatırlayırıq: dövlətin ərazi bütövlüyünün pozulması və nəticədə torpaqlarımızın işğal olunması, müxtəlif qondarma və separatçı qruplaşmalar tərəfindən "müstəqil ərazi vahidi” iddiaları və bu istiqamətdə cəhdlərin göstərilməsi, “bugünkü gün” yanaşması ilə yaşayan vətəndaşların sabaha inamının olması...
“Heydər Əliyevin hakimiyyətə qayıdaraq, daxili siyasi böhrana və beynəlxalq siyasi meydanda baş verən proseslərə rəğmən vəziyyətin məsuliyyətini bütövlükdə üzərinə götürməsi böyük iradəyə və xalqın etimadına əsaslanmışdır. Bütün bunlar 15 iyun tarixini yalnız Milli Dirçəliş Günü kimi deyil, eyni zamanda, milliliyimizin dirçəliş günü olaraq qeyd etməyə əsas verir. Milliliyimizin Dirçəlişi Günü mübarək!”, - deyə Ş.Seyidzadə vurğulayıb.
