Azərbaycan Dövlət Həkimləri Təkmilləşdirmə İnstitutunun professoru Fərəcova Natəvan Alış qızı tərəfindən“Qıcıqlanan bağırsaq sindromu” haqqında Abşeron Rayon Poliklinikasının və kənd məntəqələrinin həkimlərinə məruzə oxundu. Bu həkimlər arasında geniş müzakirələrə və yeni sualların yaranmasına səbəb oldu.
Bağırsağın qıcıqlanma sindromu BQS yoğun bağırsağın funksional pozğunluğudur. Xəstəlik 30-40 yaşlar arasında, daha çox qadınlarda rast gəlinir. Əhali arasında bu patologiya 14-45 % təsadüf olunur. BQS zamanı qarında ağrı ilə eyni vaxtda qəbzlik və ya ishal müşahidə oluna bilər. Həkimlər bu şikayətlərə çox tez -tez rast gəlir. Çox zaman xəstələr həkimə müraciət etmirlər. Yalnız daha həssas və şikayətləri kəskin olan xəstələr həkimə müraciət edirlər.
Səbəbləri• Sinir-psixi amillər
• Yemək rejiminin pozulması
• Az hərəkətli həyat tərzi
• Rasionunda lazımi qədər ballast maddələrin, bitki mənşəli hüceyrə və liflərin olmaması
• Endokrin pozğunluqlar
• Keçirilmiş kəskin bağırsaq xəstəlikləri və disbakterioz
Əlamətləri• Qarın nahiyəsində ağrı və ya diskomfort
• Defekasiya aktından sonra ağrının azalması və ya tamamilə keçməsi
• Gündə üç dəfədən çox olmaq şərtilə qarın işləməsi və ya həftədə üç dəfədən az olaraq qəbzlik mövcud olur
• Köp və nəcislə seliyin xaric olması.
Belə ki, yuxarıdakı əlamətləri hiss edən hər bir xəstə dərhal həkimə müraciət etməli, özbaşına heç bir dərman preparatı qəbul etməməlidir. Unutmayaq, sağlamlığımız ilk növbədə öz əlimizdədir.
Abşeron rayon Poliklinkasının baş həkim vəzifəsinin müvəqqəti icraçısı
Əminə İsmixanova
