Abşeronda seçki hüququ üzrə treninqlər davam edir-Azərtac
Tarix:14-03-2018, 16:39
Aprelin 11-də keçiriləcək növbəti prezident seçkiləri ilə bağlı məntəqə seçki komissiyalarının üzvləri üçün təşkil olunan seçki hüququ üzrə üçgünlük treninqlər davam edir. Mərkəzi Seçki Komissiyasının (MKS) təşkilatçılığı ilə martın 12-dən başlayan treninqlər 45 saylı Abşeron seçki dairəsi dairə seçki komissiyasında gün ərzində iki dəfə olmaqla yüksək fəallıq şəraitində keçir.
45 saylı Abşeron seçki dairəsi dairə seçki komissiyasının sədri Dilşad Abbasova aşağı seçki komissiyalarının üzvlərinin maarifləndirilməsi proqramı çərçivəsində treninq iştirakçılarına məşğələlərin əhəmiyyəti barədə məlumat verib. Bildirilib ki, seçici siyahıları artıq dəqiqləşdirlib və seçicilərin öz adlarını görə biləcəyi yerlərə vurulub. Treninqdə seçki günü məntəqə sədrlərinin vəzifə borcları barədə bir daha məlumat verilib, sual doğura bilən məqamlar aydınlaşdırılıb.
Diskussiya formatında keçən treninqdə slaydlar vasitəsilə Seçki Məcəlləsinin bəzi maddələri ətraflı izah olunub.
Diqqətə çatdırılıb ki, 45 saylı Abşeron seçki dairəsinin tərkibində 36 seçki məntəqəsi var. Seçki dairəsində qeydiyyatda olan seciçilərin sayı isə 47 min 761 nəfərdir. 300 nəfər ilk dəfə səs verəcək.
Qeyd edək ki, treninqlər Azərbaycan Respublikası Prezidentinin 2011-ci il 27 dekabr tarixli Sərəncamı ilə təsdiq edilmiş “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı” əsasında təşkil olunur.