50 saylı Abşeron-Qobustan seçki dairəsində aprelin 11-də keçiriləcək prezident seçkilərinə hazırlıq işləri tamamlanmaq üzrədir. Dairə seçki komissiyasının sədri Rafəddin Nağdalıyevin sechki-2018.az saytına verdiyi məlumata görə, dairə üzrə 49 daimi məntəqə yaradılıb. 7 məntəqədə veb-kameralar quraşdırılıb. Bundan başqa, seçkiyə 5 gün qalmış 2 müvəqqəti məntəqənin yaradılması nəzərdə tutulub.
Seçki dairəsi üzrə seçicilərin ümumi sayının 46 min 222 nəfər olduğunu deyən R.Nağdalıyev 129 nəfərin ilk dəfə səs verəcəyini qeyd edib. O bildirib ki, dairə üzrə ən yaşlı seçicinin 106 yaşı var. Bundan əlavə, 1 seçicinin 104, 2 nəfərin isə 100 yaşı tamam olub.
Dairə seçki komissiyasının sədri əlavə edib ki, bugünədək 162 müşahidəçi qeydiyyatdan keçib.
R.Nağdalıyev onu da bildirib ki, seçkiyə ümumi hazırlıq işlər tam qaydasında gedir. Bütün məntəqələr MSK tərəfindən göndərilmiş zəruri avadanlıqlarla təmin olunub, texniki məsələlər öz həllini tapıb.