Prezident yanında Gənclər Fondunun maliyyə dəstəyi ilə “Biz Azərbaycanlıyıq” gənclərin yaradıcılıq müsabiqəsi layihəsi artıq yekulaşıb. SİA-nın xəbərinə görə, bu gün Yeni Azərbaycan Partiyasının Gənclər Birliyinin ofisində keçirilən tədbirdə çıxış edən layihənin rəhbəri Sərraf Hüseynov bildirib ki, əsas məqsəd müasir dünyada öz yeri və rolu olan Azərbaycanı hazırki zirvəyə ucaldan və Azərbaycan xalqının Ümumilli Lideri Heydər Əliyev tərəfindən yaradılan Azərbaycançılıq məfkurəsini gənclər arasından təbliğ etməkdir.
Onun sözlərinə görə, layihənin əsas ideyası gənclərin milli vətənpərvərlik ruhunda tərbiyə olunmasına dəstək olmaqdır: "Layihə çərçivəsində Azərbaycançılıq məfkurəsinin vacibliyini, onun müstəqil dövlətimizin inkişafında rolunu ifadə edəcək videorolik və bukletlər hazırlanıb. Layihə əsasən orta məktəblərin yuxarı sinif şagirdlərini və ali, həmçinin orta ixtisas məktəblərinin tələbələrini əhatə edib. Eyni zamanda, bu müddət ərzində “Biz Azərbaycanlıyıq!” adlı kitab çap edilib. Kitabda 20-yə yaxın gəncin şeir, hekayə, dram, esse, publisistik məqalələri toplanıb. Bundan əlavə, kitabda Azərbaycançılıq məfkurəsinin əsasları, bu ideologiyanın gənclərimiz üçün dəyər və əhəmiyyəti, Azərbaycançılıq ideologiyasının milli dövlətçiliyimizin inkişafında rolundan bəhs edən məqalə də çap edilib".
Qeyd edək ki, YAP Gənclər birliyi Ofisində təqdim edilən kitabda yazıları çap edilən gənclərə təşəkkürnamələr təqdim edilib.