“Azərbaycanın Davos İqtisadi Forumunda dövlət başçısı səviyyəsində təmsil olunmasının özü ölkəmizin uğurlarından xəbər verir və alqışlanmalı haldır”.
Azərbaycan prezidentinin forum çərçivəsində bir sıra ölkələrin rəsmiləri, iş adamları ilə görüşünü və kütləvi informasiya vasitələrinə müsahibəsini xatırladan deputat dövlət başçısı İlham Əliyev Çin televiziyasına verdiyi müsahibədə çox uğurlu məsələlərə toxunduğunu dilə gətirib: “Azərbaycan Prezidenti mühüm məsələlərə toxunmaqla ölkəmizin inkişafını hərtərəfli şəkildə dünyaya təqdim etdi. Azərbaycan Prezidenti çıxışı zamanı ölkəmiz tərəfindən həyata keçirilən iri layihələr, neft-qaz kəmərləri, ipək yolundan, iqtisadiyyatımızın şaxələnməsindən söz açdı. Dövlət başçısı qeyd etdi ki, Azərbaycan vaxtilə borc alan ölkə olsa da, son illər iqtisadi inkişafımız ölkəmizi borc verən dövlətə çevrilib. Artıq Azərbaycan layihələrin reallaşmasında digər ölkələrə yardım edir. Bütün bunlar forumda iştirak edən dövlətlərin marağına səbəb olmaqla yanaşı, gələcək əməkdaşlıqlara yol açır ki bu da ölkəmizin xeyrinədir”.
E.Məmmədov vurğulayıb ki, forumda iştirak edən ölkələrin hər biri qazandığı uğurlardan, iqtisadi sahədə qarşılaşdığı çətinliklər və onların aradan qaldırılmasından danışır, gələcək plan və vəzifələr haqqında danışır, geniş fikir mübadiləsi aparılır: “Bununla da ölkələr bir-birilərinin iqtisadi fəaliyyətinə daha yaxından bələd olur və bu da nəticə etibarı ilə gələcək münasibətlər, layihələrin həyata keçirilməsində mühüm əhəmiyyət kəsb edir”.
Prezident İlham Əliyevin Forum çərçivəsində Ermənistanın baş naziri Nikol Paşinyanla qeyri-rəsmi görüşünə toxunan E. Məmmədov görüşün müsbət nəticələrinin olacağı dilə gətirib: “Görüşlə bağlı detallar açılmayıb. Amma ümumilikdə görüş zamanı aparılan müzakirələr Dağlıq Qarabağ münaqişəsinin həlli istiqamətində aparılan danışıqların gələcək istiqamətlərinin müəyyənləşməsində ümumi işin xeyrinə ola bilər. Bildiyiniz kimi fevral ayında Azərbaycan və Ermənistan XİN başçılarının növbəti görüşünün keçirilməsi nəzərdə tutulur. Fevral görüşü öncəsi Azərbaycan Prezidenti ilə Ermənistanın baş naziri arasında keçirilən qeyri-rəsmi görüş məsələləri müsbət məcraya yönəlməsində əhəmiyyətlidir”.
E. Məmmədov əlavə edib ki, forumda iştirak edən Ermənistan Azərbaycanın işğala məruz qalmasına baxmayaraq nə qədər inkişaf etdiyinin bir daha şahidi olur: “ Onlar Azərbaycanın inkişafına baxıb bu illər ərzində işğalçılıqdan başqa heç nəyə nail olmadıqlarını düşünməlidirlər. Düşmən ölkə səfalət içində yaşayan xalqına bir qüdrətli Azərbaycana baxmalı və bundan nəticə çıxarmalıdır ”.
