“Vyana görüşünün əsas nəticələrindən biri tərəflərin birbaşa danışıqları davam etdirmək qərarına gəlməsi oldu”.
ATƏT-in Minsk qrupu həmsədrlərinin danışıqların konstruktiv məcrada getdiyini bəyan etdiyini xatırladan politoloq söyləyib ki, Azərbaycan dövlət və Ermənistan hökumət başçılarının görüşündə humanitar tədbirlərin görülməsi, atəşkəs rejiminə riayət edilməsi barədə razılıq əldə olunub ki, bu da təmas xəttində istər hərbi qulluqçularımızın, istər də mülki əhalinin həyatının təhlükəsizliyinin qorunması baxımdan xüsusilə bizim üçün önəmlidir: “Çünki atəşkəsi bir qayda olaraq Ermənistan pozur. Birbaşa əlaqə mexanizmlərinin təkmilləşdirilməsi barədə razılıq da bu baxımdan əhəmiyyətlidir ki, Prezident İlham Əliyev və Ermənistanın baş naziri Nikol Paşinyan operativ, birbaşa, üçüncü tərəfin vasitəçiliyi olmadan əlaqə saxlaya bilərlər”.
N.Məmmədov bildirib ki, Prezident İlham Əliyev TASS informasiya agentliyinə verdiyi açıqlamada da danışıqların formatının saxlanılmasının əhəmiyyətini qeyd edib: “Ölkə başçısı müsahibəsində bildirdi ki, danışıqlar prosesi humanitar aksiyalarla dəstəklənməlidir. Dövlət başçısı vurğuladı ki, “Biz substantiv danışıqlar aparılması lazım olan situasiyaya qayıtmışıq. XİN başçılarına danışıqları davam etdirmək göstərişi verilib"”.
Politoloqun sözlərinə görə, Prezident İlham Əliyevin Rusiya agentliyinə müsahibəsi zamanı qeyd etdiyi əsas məqamlardan biri Vyanada aparılan danışıqların prosesinə məsələnin mahiyyəti üzrə yeni başlanğıc, impuls verməsi ilə bağlı oldu: “Prezident haqlı olaraq qeyd etdi ki, ilk yerdə Azərbaycanın beynəlxalq hüquq, Helsinki yekun aktı və BMT-nin 4 qətnaməsi çərçivəsində tanınmış sərhədlərinin bərpası həyata keçməlidir. Ermənistan baş naziri Paşinyan da ölkəsinin Avstriyadakı səfirliyində erməni diasporu nümayəndələri ilə görüşdə danışıqlarla bağlı müsbət fikir bildirərək qeyd edib ki, "əsas odur ki, tərəflər problemlər barədə danışmağa başlayıblar"”.
N. Məmmədova qeyd edib ki, dövlət rəhbərləri arasında iki saatlıq təkbətək görüşdən sonra liderlərin açıqlamaları, gəldikləri müəyyən razılaşmalar danışıqların əvvəlki format üzrə aparılması, Ermənistan baş nazirinin rəsmi tərəf kimi ilk dəfə danışıqlarda iştirakı və bu prosesdə davamlı iştiraka razılıq verməsi, danışıqların humanitar aksiyalarla dəstəklənməsi, iki ölkə rəhbərinin birbaşa əlaqə kanallarının təkmilləşdirilməsi baxımdan əhəmiyyətli hesab oluna bilər.