Dünən Abşeron rayon Heydər Əliyev Mərkəzində Yeni Azərbaycan Partiyası (YAP) Abşeron rayon təşkilatı “Qarabağ Azərbaycandır və nida işarəsi” mövzusunda “dəyirmi masa” keçirib.
Tədbirdə YAP Abşeyron rayon təşkilatının sədri Bilman Vəliyev, təşkilatın sədr müavini İlham Manafov, Mədəniyyət şöbəsi ilk partiya təşkilatının üzvləri və partiya rayon təşkilatının Gənclər Birliyinin fəalları iştirak ediblər.
Tədbiri giriş sözü ilə açan YAP Abşeron rayon təşkilatının sədri Bilman Vəliyev Azərbaycan Prezidenti İlham Əliyevin Soçidə təşkil olunan “Valday” Beynəlxalq Diskussiya Klubunda çıxışının olduqca yüksək maraq və diqqətlə qarşılandığını, öz növbəsində, bir sıra mühüm mesajlarla yadda qaldığını qeyd edib.
B.Vəliyev həmçinin MDB-nin Dövlət Başçıları Şurasının məhdud tərkibli Aşqabad zirvə toplantısında Azərbaycan Prezidenti İlham Əliyevin çıxışı zamanı söylədiyi cəsarətli fikirlərini bir daha “dəyirmi masa” iştirakçılarının nəzərinə çatdırıb.
Sədr qeyd edib ki, bu cür çıxışlar Azərbaycan Prezidentinin qətiyyətindən, ərazi bütövlüyümüzün mütləq bərpa olunacağından xəbər verir: “Qarabağ Azərbaycanın ayrılmaz tərkib hissəsidir! Bayrağımızın tezliklə işğal altında olan torpaqlarımızda dalğalanacağına ürəkdən inanıram”.
Sonra YAP Abşeron rayon təşkilatının sədr müavini İlham Manafov çıxış edərək deyib ki, dövlətimizin başçısının məlum çıxışı Azərbaycan torpaqlarının işğaldan azad ediləcəyi günün uzaqda olmadığına bir mesaj idi. İ.Manafov xalqımızın bu məsələdə Prezidentimiz İlham Əliyevin mövqeyini birmənalı şəkildə dəstəklədiyini vurğulayıb.
Daha sonra Mədəniyyət şöbəsi ilk partiya təşkilatının üzvləri və Gənclər Birliyinin fəalları mövzu ətrafında çıxış edərək öz fikirlərini tədbir iştirakçıları ilə bölüşüblər.