Ermənistan silahlı qüvvələri öz mənfur əməllərinin davamı olaraq iyulun 12-də Azərbaycan-Ermənistan sərhədində yerləşən Tovuz rayonunda təxribata əl atdı. Hərbi təxribatın qarşısı ən qısa müddətdə müzəffər ordumuz tərəfindən alındı. Növbəti günlərdə də ermənilərin layiqli cavabı verildi və düşmənin çoxlu sayda hərbi texnikası, müdafiə qurğuları və canlı qüvvəsi sıradan çıxarıldı.
Bu fikirləri AbşeronXəbər-ə açıqlamasında Milli Məclisin deputatı Şahin Seyidzadə deyib.
Deputat diqqətə çatdırıb ki, Azərbaycanın güclü, Ali Baş Komandanın əmrlərini yerinə yetirməyə tam hazır, nizami ordusu var. Azərbaycan Ordusu hər zaman düşmənə lazımi cavab verməyə, ərazi bütövlüyümüz uğrunda vuruşmağa həm canlı qüvvə, həm də maddi-texniki baza baxımından hazırlıqlıdır. Ordumuz bunu 2016-cı ilin şanlı Aprel döyüşlərində də mənfur düşmənə sübut edib.
Ş.Seyidzadə bildirib ki, güclü və nizamlı ordunun arxasında daim vətənpərvərliyi və mərdliyi ona dəstək olan xalq durur. Xalq da son döyüşlər zamanı öz birliyini, əsgərlərimizə dəstəyini bir daha göstərdi. Bir gecə ərzində paytaxtın müxtəlif yerlərində yüzlərlə, minlərlə şəxs küçələrdə “Qarabağ” deyərək yürüş etdi. Bu, igid əsgərlərə, ölkə başçısına dəstək və birliyin nümayişi olmaqla düşmənə bir daha Azərbaycan xalqının möhkəmliyini göstərdi.
Azərbaycanın regionda bütün sahələrdə güclü ölkə olduğunu vurğulayan deputat bildirib ki, ölkəmiz müstəqil daxili və xarici siyasət yürütməklə inkişaf edir və öz gücünə arxalanır: “Əmin-amanlıq, təhlükəsizlik və sabitlik müstəqillik dövründə gənc ölkəmizin ən böyük uğurlarındandır. Hər nə qədər pandemiya dövrünün təhlükəsi göz önündə olsa da, xalq birləşərək, milli iradə, vətənpərvərlik nümayiş etdirərək güclü, əyilməz olduğumuzu dünyaya sübut etdi.
Düşmənin növbəti təxribata əl atdığı bir vaxtda bizim birliyə böyük ehtiyacımız var. Məhz elə bu zamanda, elə bu məqamda hər kəs bu birliyi göstərdi. Azərbaycan Ordusuna dəstək məqsədilə keçirilmiş aksiya cəmiyyətimizdə vətənpərvərlik ruhunun yüksək olduğunu bir daha nümayiş etdirdi. Aksiya iştirakçılarının vətənpərvərliyi, onların səfərbərlik elan olunması istəyi, ordu sıralarında qulluq etmək niyyəti sevindirici və qürurverici haldır”.
Deputatın sözlərinə görə, hər kəs öz birlik mövqeyini küçəyə çıxa bilməsə belə, bacardığı qədər, məsələn, sosial şəbəkələrdə göstərdi. Hər kəs müxtəlif vasitələrlə istər ermənilərin son təxribatı ilə, istərsə də Dağlıq Qarabağ və ətraf 7 rayonun işğalı ilə bağlı həqiqətləri daha geniş ictimaiyyətə çatdırmaq üçün əlindən gələni etməyə davam edir. Bu məsələdə həm də siyasi partiyalar birləşərək ölkə başçısının vahid siyasətini dəstəklədiyini göstərdi. Bununla yanaşı, vətənpərvərlik, dəstək aksiyasına siyasi məzmun verilməsinə, neqativ emosiyaların formalaşdırılmasına cəhdlər göstərilməsi yolverilməzdir. Eyni zamanda, sosial şəbəkələr vasitəsilə həm cəbhə xəttində, həm də paytaxtda arzuolunmaz proseslərin baş verməsi barədə yalan məlumatlar yayıldı. Bu, həm dövlətimizin, həm ordumuzun gördüyü işlərə, həm də bu aksiyanın təşkilinə kölgə salmaq məqsədi daşıyırdı.
“Sərhəd ərazisində baş verənlərlə bağlı hələ uzun müddət təhlillər aparılacaq, müxtəlif mövqe və fikirlər səsləndiriləcək. Lakin bir mövqe artıq şübhəsizdir - hər kəsin Azərbaycan dövlətinin və Prezidentinin ətrafında birləşməsi reallıqdır”, - deyə Şahin Seyidzadə vurğulayıb.
