Xırdalan şəhərində yerləşən 17 saylı körpələr evi- uşaq bağçası 1976-ci ildən fəaliyyət göstərir. Bu illər ərzində minlərlə uşaq bağçada tərbiyə alaraq məktəblərə üz tutub. Hazırda burada 8 qrup - kiçik, orta, qarışıq və 5 məktəbəqədər qrup (4 Azərbaycan və 1 rus bölməsi) fəaliyyət göstərir. Həmin qruplarda 255 uşağın təlim-tərbiyyəsi ilə 26 tərbiyəçi-müəllim məşğul olur. Bağçada əsaslı təmir işləri aparılıb və hər cür ləvazimatlarla təmin olunub. Cari ildə 86 uşaq (20 nəfər rus bölməsindən) bağçadan məktəbə yola salınacaq. Bu münasibətlə təşkil olunan tədbirdə Rayon Təhsil şöbəsinin (RTŞ) müdir müavini Pərviz Əhmədov, RTŞ-nın Məktəbəqədər Təhsil Müəssisələri üzrə metodisti Samirə Məmmədova , bağçanın müəllim kollektivi, balacalar və onların valideynləri iştirak ediblər.
17 saylı körpələr evi-uşaq bağçasının müdiri Gülnar Nəbi çıxış edərək bağça dünyası ilə vidalaşaraq məktəb illərinə qədəm qoyacaq fidanlara uğurlar arzulayıb.
Sonra rus bölməsinin uşaqların ifasında müsiqili-əyləncəli tədbir başlayıb.
Onlar Vətənə, anaya, müəllimə, ana dilimizə aid şeirlər söyləyiblər. Uşaqların iştirakı ilə hazırlanmış bir neçə kompozisiya, milli rəqslərimizlə yanaşı əcnəbi rəqs nömrələri də nümayiş etdirilib.
Tədbirdə çıxış edən rayon Təhsil şöbəsinin müdir müavini Pərviz Əhmədov uşaqları məktəbə getmələri münasibəti ilə təbrik edib, onlara gələcək həyatda müvəffəqiyyətlər və ölkəmiz üçün layiqli övlad olmalarını arzulayıb.
Rayon Təhsil Şöbəsinin Məktəbəqədər Təhsil Müəssisələri üzrə metodisti Samirə Məmmədova qeyd edib ki, hazırda Abşeronda 26 körpələr evi-uşaq bağçasında 2750 uşaq təlim-tərbiyyə alır. Onun sözlərinə görə, bu il 38 məktəbə hazırlıq qrupunda 760 nəfər uşaq məktəbə yola salınır ki, bunların da 100 nəfəri rus bölməsinin payına düşür.
Şamo Əliyev
