Xırdalan şəhər 2 №-li tam orta məktəbin akt zalında məktəbin müəllimi Gülnarə Mehdiyevanın təşkilatçılığı ilə V-IX sinif şagirdlərinin hazırladıqları Xocalı soyqırımının 25-ci ildönümünə həsr olunmuş “Xocalı harayı” adlı ədəbi – bədii gecə keçirilib. Tədbirə məktəbin müəllim kollektivi, V-IX sinif şagirdlərilə yanaşı, Xocalı şəhid ailələri, bu faciəni görən iştirakçılar və qocaman müəllim Oqtay Sadıqov da dəvət olunmuşdu.
Tətbirin əsas məqsədi Xocalı soyqırımı haqqında şagirdləri məlumatlandırmaq, vətənpərvərlik ruhunu yüksəltmək idi.
Əvvəlcə dövlət himni səsləndirildi, soyqırım qurbanlarının xatirəsi bir dəqiqəlik sükutla yad edildi.
Xırdalan şəhər 2 №-li tam orta məktəbin direktoru, Azərbaycan Respublikasının "Tərəqqi" medallı müəllimi Ədalət Camalova 1992-ci il fevral ayının 25-dən 26-na keçən gecə erməni silahlı birləşmələri tərəfindən azərbaycanlılara qarşı törədilən soyqırımdan danışıb. Ə.Camalova bildirib ki, Xocalı soyqırımı Azərbaycan tarixinə ən dəhşətli və faciəli səhifələrdən biri kimi daxil olub. Xalqımız 200 il ərzində erməni millətçi-şovinistlərinin davamlı olaraq etnik təmizləmə və soyqırım siyasətinə məruz qalıb. Bu soyqırım mahiyyətcə xalqımıza qarşı bir neçə əsr bundan əvvəl başlanan erməni təcavüzünün davamı və tərkib hissəsi idi.
Ə.Camalova bu soyqırımın dünya ictimaiyyətinə çatdırılması istiqamətində görülən işlərdən də danışıb. Bildirib ki, dünyanın bir neçə ölkəsində Xocalı soyqırımını əks etdirən abidə ucaldılıb, bir çox ölkələr bu soyqırımı tanıyır.
Daha sonra bu qorxulu gecəni yaşamış Xocalı şəhər sakinləri, Zeynəb Şahidqızı, Tural Nurməmmədov və qocaman müəllim Oqtay Sadıqov çıxış etdilər. Onlar çıxış edərək əsrin ən dəhşətli faciəsi haqqında tədbir iştirakçılarına məlumat verdilər. Bildirildi ki, Xocalı soyqırımı 1992-ci il fevralın 25-dən 26-na keçən gecə Ermənistan silahlı qüvvələri tərəfindən Rusiyanın 366-cı motoatıcı alayının iştirakı ilə Xocalı şəhərini işğal edərkən etnik azərbaycanlılara qarşı baş vermiş bu soyqırım əsrin faciəsi olmuşdır. Bu soyqırım nəticəsində 63-ü uşaq, 106-ı qadın, 70-i qoca və qarı olmaqla – 613 nəfər Xocalı sakini qətlə yetirilmiş, 8 ailə tamamilə məhv edilmiş, 25 uşaq hər iki valideynini, 130 uşaq valideynlərindən birini itirmişdir. Düşmən gülləsinə tuş gəlib yaralanan 487 nəfərdən 76-sı uşaq idi. 1275 xocalılı əsir, 150 xocalılı itkin düşmüşdür. Hal-hazırda bu faciə Dağlıq Qarabağ münaqişəsi zamanı baş vermiş ən dəhşətli hadisələrdən biridir.
Məktəbin şagirdləri Xocalı faciəsinə həsr edilmiş şeirlər, o qanlı gecəni həsr edən səhnəciklər göstərdilər. Şagirdlər “Xocalı soyqırımı”na həsr olunmuş şeirlərlə yanaşı, “İgid əsgər”, “Cənab leytenant” kimi mahnılarda ifa ediblər.
Tədbirdə böyük inam hissi ilə qeyd olundu ki, məhz Ali Baş Komandan cənab İlham Əliyevin rəhbərliyi ilə igid oğullarımızın hünəri sayəsində Azərbaycan bayrağı tezliklə Şuşada, Xankəndində, işğal altında olan digər ərazilərdə dalğalanacaq, şəhidlərimizin qanı yerdə qalmayacaqdır.
Şamo Əliyev