Prezident İlham Əliyevin sərəncamına uyğun olaraq, Xırdalan şəhər 2 nömrəli tam orta məktəbdə Xalq şairi, dramaturq Səməd Vurğunun anadan olmasının 110 illik yubileyi münasibəti ilə bağlı məktəbin Azərbaycan dili və ədəbiyyatı müəllimi Nərgiz Qaragözovanın təşkilatçılığı və 5c sinif şagirdlərinin iştirakı ilə hazırlanmış tədbir keçirilib.
Əvvəlcə qonaqlar unudulmaz şairin həyat və yaradıcılığını əks etdirən kitabların yer aldığı sərgi ilə tanış olublar .Tədbirdə məktəbin müəllimi N. Qaragözova şairin həyat və yaradıcılığı barədə danışıb. Daha sonra şairin ömür yoluna işıq salan videoçarx nümayiş olunub, məktəbin şagirdlərinin hazırladığı ədəbi bədii kompozisiya numayiş olunub.
Toplantıda məktəbin direktoru çıxış edərək böyük şairin həyat və yaradıcılığı ilə yanaşı, Azərbaycan ədəbiyyatının inkişafındakı misilsiz xidmətlərindən danışıb.
“Xalq Şairi Səməd Vurğunun adı, şəxsiyyəti və yaradıcılığı Azərbaycan xalqının tarixi, mədəniyyəti bugünkü müstəqilliyimizin ideoloji əsasında dayanan azərbaycançılıq məfkurəsi ilə birbaşa bağlıdır. Təsadüfi deyil ki, ümummilli lider Heydər Əliyev böyük şairin yaradıcılığına həmişə önəm verərək onun “Azərbaycan” şeirinin misralarını yüksək kürsüdən xüsusi hissiyyatla söyləyib”, - deyə Ə.Camalova bildirib.
Xalq yaradıcılığı və şifahi söz sənətinin Səməd Vurğun poeziyasının mayasını, qayəsini təşkil etdiyini deyən Ə.Camalova şairin xalqımızın zəngin söz xəzinəsindən məharətlə bəhrələnərək yüksək poetik potensialı və dərin idrakı ilə XX əsr Azərbaycan şeirinə xüsusi çalarlar gətirdiyini söyləyib.
Diqqətə çatdırılıb ki, unudulmaz şair qısa bir zamanda tamamladığı “Vaqif” dramında Molla Pənah Vaqifin faciəli həyatını, şair böyüklüyünü, kamilliyini ustalıq və məhəbbətlə əks etdirib. O, “Vaqif” dramına görə ən ali mükafatlara layiq görülüb. Uzun illər teatr səhnələrində oynanılan bu dram tamaşaçıların böyük rəğbətini qazanıb.
Səməd Vurğunun müasir və tarixi-əfsanəvi mövzularda da bir çox əsərlər müəllifi kimi tanındığını söyləyən direktor qeyd edib ki, şairin “Ölüm kürsüsü”, “Qız qayası”, “Dar ağacı”, “Ölən məhəbbət”, “Aslan qayası”, “Üsyan”, “Bəsti”, “Ayın əfsanəsi” və “Bulaq əfsanəsi” əsərləri bu qəbildəndir. Ana dilimizin şeriyyət və ahəngini dərindən duyan şair ədəbiyyatla xalq arasında möhkəm bağlılıq yaradaraq özü də bu birliyin bayraqdarına çevrilib. Şairin poeziyası multikulturalizmə, tolerantlığa və birliyə çağırış himni kimi səslənir. Bu mütərəqqi tendensiyaları bədii irsində mükəmməl şəkildə birləşdirməyi bacaran S.Vurğun ürəklərdə özünə əbədi heykəl ucaldıb.
Daha sonra məktəbin şagirdləri şairin “Vaqif” dramı əsasında hazırlanmış səhnəcik göstəriblər. Gecədə S.Vurğunun şeirlərinə bəstələnmiş mahnılar ifa olunub, şeirləri səsləndirilib.
Hazırlanmış bədii proqram valideyn və qonaqlar tərəfindən böyük maraqla qarşılanıb.
Şamo Əliyev
