Xırdalan şəhər 26 saylı bağçada Novruz bayramına həsr olunan ədəbi-bədii tədbir keçirilib. Tədbiri giriş sözü ilə 26 saylı uşaq bağçanın müdiri Nigar Səfərova açaraq, uşaqları, onların valideynlərini, bağçanın kollektivini və tədbirə dəvət almış qonaqları bayram münasibətilə təbrik edərək, onlara əmin-amanlıq, ruzi-bərəkət və firəvan həyat arzulayıb.
Bahar tumurcuqlarına, yaz çiçəklərinə bənzəyən milli geyimlərdə olan körpələr ”Qarabağ şikəstəsi” sədaları altında səhnəyə gələrək vətənə, torpağa, bahara,novruza aid öyrəndikləri şeirləri söyləyiblər.
Körpələri təbrik etmək üçün gələn Kecəl, Kosa və Bahar qız alqışlarla qarşılanıb.Uşaqların hazırladıqları ədəbi-bədii kompozisiya,ifa etdikləri mahnılar, rəqslər şənliyə rəng qatıb.Bayram tədbirində iştirak edən valideynlər və qonaqlar uşaqlara maraqlı və əyləncəli gün yaşatdıqları üçün tədbirin təşkilatçılarına minnətdarlıqlarını bildiriblər.
Şamo Əliyev