“Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2013-2018-ci illər üçün Dövlət Proqramı”nın icrası ilə əlaqədar Abşeron RPİ-nin təşkilatçılığı və Abşeron RİH-in dəstəyi ilə aprelin 11-də Qobu qəsəbəsindəki 2 nömrəli tam orta məktəbdə “Narkomaniya - əsrin bəlasıdır” mövzusunda tədbir keçirilib.
Tədbirdə qəsəbə ictimaiyyət nümayəndələri, Abşeron RİH-in, hüquq-mühafizə orqanlarının əməkdaşları və gənclər iştirak edib.
Qobu qəsəbə 2 nömrəli tam orta məktəbin direktoru Lətifə Əmiraslanova narkomaniya və digər zərərli vərdişlərin cəmiyyətə, ailə dəyərlərinə mənfi təsirini diqqətə çatdırıb, bu ümumbəşəri bəlaya qarşı mübarizədə cəmiyyətin hər bir fərdinin dövlətə dəstək olmasının vacibliyini qeyd edib.
Yığınçaqda çıxış edən rayon polis şöbəsinin rəis müavini, polis polkovniki Elçin Rəcəbov tədbirin keçirilməsində əsas məqsədin narkomaniyanın yaratdığı problemləri ictimaiyyətin diqqətinə çatdırmaq, bu sahədə məsuliyyəti artırmaq və gəncləri problemi yaradan səbəblərin aradan qaldırılmasına səfərbər etmək olduğunu bildirib.
O, narkomaniyanın cəmiyyətin mənəvi və əxlaqi dəyərlərini sarsıdan, insanların həyat və sağlamlığına ciddi təhlükə yaradan amil olduğu qeyd edərək, bu bəlaya düçar olanların potensial cinayətkarlara çevrildiklərini vurğulayıb.
Toplantıda Abşeron RPİ-nin polis mayoru Elburus Əhmədov, Rayon icra hakimiyyətinin əməkdaşı Hafiz Mikayılov, rayon Gənclər və İdman İdarəsinin rəisi Əsgər Əmirəliyev və digər natiqlər çıxış ediblər.
Çıxış edənlər narkomaniyanı bəşəriyyətin ən böyük bəlası adlandıraraq şagirdlərə onun cəmiyyətin mənəvi və əxlaqi dəyərlərinə böyük zərbə vurduğunu, sosial-iqtisadi inkişafa mənfi təsir göstərdiyini, insanların həyat və sağlamlıqlarına ciddi təhlükə yaratdığını və cinayətkarlığın artmasına səbəb olduğunu deyiblər
Sonda narkomaniyanın törətdiyi bəlalardan bəhs edən videoçarx nümayiş olunub, şagirdləri maraqlandıran mövzular barədə fikir mübadiləsi aparılıb.
Şamo Əliyev