Ömrümüzün ən dəyərli dövrünü əhatə edən qayğısız məktəb illəri hər birimizin xatirəsində silinməz izlər qoyub. Bunlardan ən birincisi uşaqlıq illərimizin ilk sevinci olan “Əlifba bayramı”nın qeyd olunduğu gündür.
Xırdalan şəhəri 2 nömrəli tam orta məktəbin 1 “ H “ sinfi də bu ənənəyə sadiq qalaraq aprelin 18-i “Kitablar aləminə səyahət” adı altında möhtəşəm bayram şənliyi nümayiş etdirdi.
Azərbaycan Respublikasının Dövlət himni səsləndirildikdən sonra söz birincilərə verildi.
Həyatlarında ilk dəfə böyük auditoriya qarşısına çıxan birincilər müstəqilliklə bağlı şeirlər və “Azərbaycan ” mahnısını ifa edərək gur alqış sədaları altında tədbirlərinin təntənəli açılışını etdilər.
Daha sonra tədbir iştirakçılarını nağıllar dünyasına səyahət etdirən istedadlı şagirdlər bir- birindən maraqlı səhnələr canlandıraraq qonaqları, sözün həqiqi mənasında, feyziyyab etməyi bacardılar. 9 ay müddətində öyrəndiklərini qüsursuz şəkildə nümayiş etdirən birincilər milli və xarici rəqsləri ilə bayramlarını daha da şənləndirdilər.
Üzərində “Əlifba”nın hərfləri, “Heca”, “Söz”, “Cümlə” yazısı olan libaslar geyinərək Azərbaycan qrammatikasını kiçik səhnə şəklində canlandıran və qüsursuz şəkildə yanıltmaclar söyləyən balacalar məharətli çıxışları ilə sübut etdilər ki, həqiqətən elmin açarı artıq onların əllərindədir.
Tarixi şəxsiyyətlərin, dünya şöhrətli Azərbaycan qadınlarının yaradıcılıq fəaliyyətlərindən qısa şəkildə danışaraq, anaya, müəllimə və xüsusən də vətənə olan sevgilərini misralarla dilə gətirən şagirdlər düşmənə meydan oxuyaraq Şuşaya, Qarabağa dönəcəklərini inamla bəyan etdilər.
Ən vacib işlərini təxirə salıb, övladlarını fəxrlə izləməyə gələn valideyn və müəllim heyəti ilə yanaşı, qocaman təhsil işçiləri də balacalara diqqət və məhəbbətini bildirmək üçün qonaq qismində təşrif buyurmuşdular.
Məktəbin direktoru Ədalət Camalova ilk olaraq birinciləri təbrik edib, onlara təhsilin növbəti pillələrində uğurlar arzuladı.
Dövlətimizin Azərbaycan təhsilinə, uşaqlara verdiyi dəyərdən, onlara göstərdiyi qayğıdan danışan Ə.Camalova tədbir boyu vətənpərvərlik mövzularına yer verildiyini yüksək qiymətləndirərək, gələcəyimiz olan bu balacaların vətənə sevgisindən zövq aldığını qeyd etdi və sinif müəllimi Nüranə Əzizovaya öz minnətdarlığını bildirdi.
Şamo Əliyev
