30 may tarixində Abşeron rayonu, Digah qəsəbə 6 saylı uşaq bağçasında “Əlvida bağça, salam məktəb” devizi altında tədbir keçirildi.
Tədbirdə Abşeron Rayon İcra Hakimiyyəti başçısı Aparatının Yetkinlik yaşına çatmayanların işləri və hüquqlarının müdafiəsi üzrə komissiyanın uşaqlarla iş üzrə məsləhətçi-psixoloqu Seymur Qasımov, 6 saylı uşaq bağçasının müdiri Aygün Məmmədova və bağçanın kollektivi iştirak etdilər.
Tədbiri açıq elan edən bağçanın müdiri Aygün Məmmədova qonaqları salamlayaraq, uşaqların hər birinə uğurlar dilədi və bildirdi ki, 6 saylı uşaq bağçası yeni binasında 2013-cü ildən fəaliyyət göstərir. Bu illər ərzində yüzlərlə uşaq bu bağçada tərbiyə almışdır. Hazırda burada 5 qrup - böyük, orta, və 2 məktəbəqədər qrup fəaliyyət göstərir və həmin qruplarda 100 uşaq tərbiyə alır. Bu il 40 uşaq bağçadan məktəbə yola salınacaqdır.
Tədbirdə çıxış edən Seymur Qasımov uşaqları təbrik edərək onlara gələcək məktəb həyatlarında uğurlar dilədi. Natiq çıxışında qeyd etdi ki, cəmiyyətin gələcək inkişafının əsasını uşaqlar təşkil edir. Daim qayğıya, şəfqətə ehtiyac duyan uşaqların hüquqlarının qorunması, onların layiqli vətəndaş kimi formalaşdırılması hər bir dövlətin başlıca sosial məsuliyyətlərindəndir. Uşaqlara qayğı təkcə dövlətin üzərinə düşən vəzifə deyil. Hər bir şəxs uşaqların hərtərəfli böyüdülməsi üçün səy göstərməlidir. Çünki uşaqlar təkcə bir evin deyil, bütün el-obanın ən qiymətli, ən dəyərli sərvəti, hər bir xalqın gələcəyidir. Gələcəyimiz olan uşaqları qorumaq isə hamımızın borcudur.
Daha sonra 6 saylı uşaq bağçasının balaca fidanları “Əlvida bağça, salam məktəb” adlı nağıl ilə maraqlı kompazisiyalar, rəqslər, şeirlər, fokus nümunələri nümayiş etdirdilər.
Tədbirin sonunda balaca fidanlarla xatirə şəkili cəkdirildi və tort kəsildi.
Şamo Əliyev
