Abşeronun Mehdiabad qəsəbəsindəki 18 nömrəli uşaq bağçasında "Əlvida, bağça" mərasimi keçirilib. Məktəbəqədər təhsil pilləsini başa vuranların son tədbirində onların valideynləri ilə yanaşı, balacaların sevincinə qoşulan qonaqlar da iştirak ediblər.
Bağçanın al-əlvan şarlarla və bayraqlarla bəzənmiş musiqi zalında keçirilən tədbirdə əvvəlcə Dövlət himni ifa olunub. "Azərbaycan" mahnısının sədaları altında əllərində kiçik bayraqlar və gül dəstələri tutmuş məzunlar zala daxil olaraq "Sizə salam gətirmişəm" mahnısı ilə tədbir iştirakçılarını salamlayıblar. Sonra tədbirin aparıcıları bildiriblər ki, bu gün biz həm fərəhlənir, həm də kədərlənirik. Fərəhlənirik ki, biz işıqlı gələcəyə - məktəbə gedirik, orada yazmağı, oxumağı öyrənərək xalqımıza, dövlətmizə layiqli vətəndaş kimi yetişəcəyik. Məyus oluruq ki, bağça həyatını başa vurub, bizim əziyyətimizi çəkən, bizə tərbiyə verən tərbiyəçilərimizdən və yoldaşlarımızdan ayrılırıq.
Uşaqlar tədbir boyu çıxışları - söylədikləri şeirlər, ifa etdikləri mahnı və rəqslər, göstərdikləri tamaşalarla məktəb təliminə hazır olduqlarını nümayiş etdiriblər.
Bağçanın müdiri Nübar Ələkbərova çıxış edərək məktəbəhazırlıq qrupunun uşaqlarını, onların valideynlərini və tərbiyəçilərini məzun günü münasibətilə təbrik edib. N. Ələkbərova bağçalarında uşaqlar üçün yaradılan şəraitə görə rayon rəhbəri İradə Gülməmmədovaya minnətdarlığını ifadə edib.
Abşeron Rayon İcra Hakimiyyəti başçısı Aparatının Yetkinlik yaşına çatmayanların işləri və hüquqlarının müdafiəsi üzrə komissiyanın uşaqlarla iş üzrə məsləhətçi-psixoloqu Seymur Qasımov çıxış edərək balacaları bu gün münasibəti ilə təbrik edib, onlara qədəm qoyacaqları yeni həyatda uğurlar arzulayıb. Fidanlara məktəbdə yaxşı oxumağı, valideynlərinin və müəllimlərinin sözlərinə və tapşırıqlarına əməl etməyi tövsiyə edib.
Məktəbəhazırlıq qrupunun uşaqları bağça ilə vidalaşma anının çatdığını, bir azdan məktəbə gedəcəklərini bildiriblər və bu münasibətlə tərbiyəçilərini, valideynlərini təbrik ediblər. Uşaqlardan ibarət xor "Sevinirik dostlar, məktəbə gedirik biz" mahnısını ifa edib.