Xırdalan şəhər 2 nömrəli tam orta məktəbi bu il 13 doqquzuncu sinif bitirərək X sinfə keçib. Həmin siniflərin bütün şagirdlərinin valideynləri ilə görüş keçirilərək məsələnin mahiyyəti, nazirliyin bu barədəki əmrinin məzmunu onlara çatdırılıb, fikir mübadiləsi aparılıb. Əmrin 4-cü maddəsi ilə əlaqədar isə xüsusi izahat verilərək şagird və valideynlərin diqqətinə çatdırılıb ki, təmayül siniflərini bitirmiş şagirdlərin tam orta təhsil haqqında attestatlarına hər təmayül üzrə təsdiq olunmuş tədris planlarındakı fənlərdən aldıqları yekun qiymətlər yazılacaq, tədris olunmamış fənlərin qarşısında "-" (tire) işarəsi qoyulacaqdır.
Valideynlər təmayülləşməni çox razılıqla qarşılayıb. Nəticədə şagirdlərin arzusu və akademik göstəriciləri nəzərə alınmaqla Azərbaycan bölməsi üzrə 9 sinifdən dörd sinf, rus bölməsi üzrə isə 4 sinifdən iki təmayül sinf yaradılıb. Təmayül siniflərində şagirdlərin sayı minimum 20 nəfər olacaq.
Təmayül sinifləri texniki, riyaziyyat-iqtisadiyyat, humanitar, təbiət, texniki və riyaziyyat-iqtisadiyyat, texniki və təbiət, riyaziyyat-iqtisadiyyat və humanitar istiqamətləri üzrə fəaliyyət göstərəcək.
Məktəbdə yüksək hazırlıqlı, yenilikçi müəllimlərin çalışdığını deyən Ə.Camalova buna baxmayaraq təmayüllər üzrə tədrisi səmərəli təşkil və şagirdlərə keyfiyyətli təhsil verilməsini təmin etmək üçün müəllimlər arasında da seçim aparıldığını, təmayül siniflərində dərs demək üçün seçilmiş müəllimlərin öyrədici təlimlərə cəlb olunduğunu söyləyib. Direktor onu da diqqətə çatdırıb ki, məktəbin təmayül sinifləri olmayan qalan 7 sinfində isə tədris Təhsil Nazirliyi tərəfindən təsdiq olunmuş fərdi tədris planları ilə aparılacaq.
Məktəb direktoru həmcinin şagirdin təhsildə uğurlu nəticə qazanması üçün məktəb valideyn əlaqələrinin nə qədər böyük əhəmiyyətə malik olduğunu iclas iştirakçılarının nəzərinə çatdırıb.
Sonda məktəb rəhbərliyi valideynləri maraqlandıran sualları cavablandırıb.
Şamo Əliyev