Abşeron rayon Xırdalan şəhər 17 nömrəli körpələr evi-uşaq bağçasında Milli Dirçəliş Günü ilə bağlı tədbir təşkil edilib. Bayram tədbirində Abşeron RİH-in əməkdaşları Elnarə Umayeva, Samirə İsmayılzadə və bağçanın pedoqoji kollektivi iştirak ediblər.
Tədbir Azərbaycan Respublikasının dövlət himninin səslənməsi ilə başlayıb.
Aparıcı, bağçanın tərbiyəçisi Sevinc Seyfullayeva tədbirin əhəmiyyətindən bəhs edib.
Bağçanın müdiri Könül İbrahimova qonaqları 17 noyabr Milli Dirçəliş Günü münasibətilə təbrik edib, xoş arzularını çatdırıb. K. İbrahimova bildirib ki, 1988-ci ilin noyabr-dekabr aylarında Bakıda başlayan milli-azadlıq hərəkatıyla bağlı olan Milli Dirçəliş Günü 17 noyabr 1992-ci ildən elan olunub və həmin tarixdən bu günü rəsmən qeyd edirik. Ümummilli lider Heydər Əliyevin Vətənə qayıdışı ilə Azərbaycanın milli- azadlıq hərəkatında yeni bir mərhələnin başladığını vurğulayan H.Məmmədov ulu öndərin o gərgin illərdə Naxçıvanda gördüyü böyük işlərdən danışıb. “1990-cı il noyabrın 17-də Naxçıvan Muxtar Sovet Sosialist Respublikası Ali Sovetinin yeni tərkibdə ilk sessiyası keçirildi. Ulu öndər Heydər Əliyevin sədrliyi ilə keçirilən bu sessiyanın qərarı ilə muxtar respublikanın adından sovet və sosialist sözlərinin götürülməsi, Azərbaycan Xalq Cümhuriyyətinin üç rəngli bayrağının Dövlət Bayrağı kimi qəbul edilməsi barədə qərar qəbul olundu. Ulu öndər Heydər Əliyev Azərbaycan SSR Ali Sovetinin 5 fevral 1991-ci il tarixli sessiyasındakı çıxışında SSRİ-dən imtinanın və müstəqillik uğrunda mübarizənin vacibliyini məntiqi şəkildə əsaslandırdı. Həmin sessiyada Azərbaycan SSR-nin adı dəyişdirilərək Azərbaycan Respublikası adlandırıldı və üçrəngli bayrağımız Dövlət Bayrağı kimi təsdiq olundu”.
Könül İbrahimovun geniş və əhatəli çıxışından sonra bağçanın körpə fidanları müstəqilliyimizə və bayrağımıza həsr olunan şeirlər söyləyib, vətənpərvərlik ruhunda mahnılar ifa ediblər.
Tədbirdə çıxış edən Elnarə Umayeva və Samirə İsmayılzadə vurğulayıblar ki, 29 il bundan əvvəl, 1988-ci il noyabrın 17-dən başlanan meydan hərəkatı müstəqil Azərbaycanın təməlini qoyub və xalqın azadlıq ruhunu oyadıb. Azərbaycan dövlətinin müstəqilliyinin böyük tarixi sınaqdan keçdiyini, xalqın uzun illər azadlıq uğrunda apardığı mübarizə nəticəsində müstəqil Azərbaycan dövlətinin yarandığını deyən icra rəsmiləri körpə fidanların tariximizin şanlı səhifələrini yaxşı öyrənməyə, müstəqilliyimizin, azadlığımızın qədrini bilməyə və bu yolda üzərlərinə düşən vəzifələrin öhdəsindən layiqli şəkildə gəlməyə çağırıblar.
Sonda isə kollektivlə xatirə şəkili çəkdirilib.
Şamo Əliyeva