Abşeron rayon ümumtəhsil məktəblərində “Narkomaniya ümumbəşəri bəladır” mövzusunda maarifləndirici tədbirlərin keçiriliməsi davam edir. Tədbirlər Abşeron Rayon İcra Hakimiyyətinin, və Rayon Polis İdarəsinin birgə təşkilatçılığı ilə həyata keçirilir.
Tədbirlərin keçirilməsində əsas məqsəd şagirdləri narkomaniya və psixotrop maddələrin yaratdığı problem və fəsadlar mövzusunda maarifləndirmək və onlar arasında sağlam həyat tərzini təbliğ etməkdir.
Növbəti tədbir Xırdalan şəhər 8 nömrəli tam orta məktəbdə baş tutub. Tədbir Dövlət himninin səsləndirilməsi ilə başlayıb.
Məktəbin direktoru Roza Məmmədova tədbiri açaraq narkotiklərin insan orqanizminə, sağlamlığa vurduğu zərərlərdən, ümumilikdə cəmiyyətdə törətdiyi sosial bəlalardan danışıb və şagirdləri narkomaniyaya qarşı mübarizədə fəal olmağa səsləyib.
Daha sonra Rayon Polis İdarəsinin Yetkinlik yaşına çatmayanlarla profilaktik işin təşkili şöbəsinin baş inspektoru Elbrus Əhmədov narkomaniya və onun fəsadları barədə geniş məlumat verib.
Abşeron Rayon İcra Hakimiyyətinin nümayəndəsi Hafiz Mikayılov öz çıxışında son illər narkotik vasitələrə qarşı mübarizənin xeyli gücləndiyini, dövlət orqanlarının bu sahədəki fəallığının xeyli artığını və sosial bəlaya qarşı aparılan kompleks mübarizə tədbirləri sırasında Abşeron rayonunda müxtəlif tədbir həyata keçirildiyini söyləyib.
Tədbir iştirakçıları, Abşeron Rayon İcra Hakimiyyətinin nümayəndəsi Mikayıl Həmidov, Gənclər və İdman İdarəsinin rəis müavini Emil Quliyev, Təhsil Şöbəsinin metodisti Aslan Həziyev , rayon poliklinikasının həkimi Aybəniz Baxışova öz çıxışlarında narkotik maddələrin insan həyatına təsirindən geniş bəhs edib, şagirdləri yaxşı təhsil almağa, idmanla məşğul olmağa çağırıblar.
Sonda iştirakçıları maraqlandıran suallar dolğun şəkildə cavablandırılıb. Həmçinin tədbirdə iştirak edənlərə narkomaniyanın törətdiyi fəsadları özündə əks etdirən videoçarx nümayiş olunub.
Şamo Əliyev