Azərbaycan xalqının ümummilli lideri, görkəmli dövlət xadimi Heydər Əliyevin xatirəsi Abşeron rayonu Xırdalan şəhər 26 nömrəli körpələr evi-uşaq bağçasında keçirilən tədbirdə ehtiramla anılıb.
Tədbir iştirakçıları önçə Heydər Əliyev Mərkəzinin önündə dahi rəhbərin abidəsini ziyarət edib, önünə tər çiçək dəstələri düzüblər.
Bağçanın musiqi zalında davam etdirilən anım mərasimində Dövlət himni səsləndirildikdən sonra, dahi şəxsiyyət Heydər Əliyevin xatirəsi toplantı iştirakçıları tərəfindən bir dəqiqəlik sükutla yad edilib.
Mərasimi bağçanın müdiri Nigar Səfərova açıb. O, ümummilli lider Heydər Əliyevin müdrik siyasətə, dönməz əqidəyə və tarixi uzaqgörənliyə malik şəxsiyyət kimi müasir Azərbaycan dövlətinin qurulması istiqamətində atdığı addımlardan bəhs edib.
N.Səfərova ulu öndərin elm, təhsil, mədəniyyət sahələrinin inkişafında göstərdiyi əvəzolunmaz xidmətlərdən, onun rəhbərliyi ilə gerçəkləşən genişmiqyaslı quruculuq proqramlarından danışıb.
"Xoşbəxt o xalqdır ki, onun ümummilli lideri var, xalq o zaman daha xoşbəxt olur ki, həmin siyasi kurs uğurla davam etdirilir" fikrini hər dəfə səsləndirdiyini xatırladan bağça müdiri bu baxımdan Azərbaycan xalqının həqiqətən də xoşbəxt olduğunu qeyd edib: "Ulu öndərin siyasi kursu möhtərəm Prezidentimiz İlham Əliyev tərəfindən uğurla davam etdirilir, milli təhsilin inkişafı məsələsi öz məzmununu dəyişərək həm də Azərbaycanın gələcək inkişaf modelinin əsasını formalaşdıran başlıca amil kimi gündəmə gətirilir, insan kapitalının formalaşmasına xidmət edən ümumtəhsil hərəkatı yeni vüsət alır".
Çıxışdan sonra bağçanın balaca sakinləri maraqlı əbədi-bədii kompozisiya təqdim ediblər. Körpə fidanlar Ulu öndər haqqında yazılmış şeirlər və mahnılarla onun xatirəsini anıblar.
Tədbirin sonunda Heydər Əliyevə həsr edilmiş videoçarx nümayiş olunub.
Şamo Əliyev