Prezident İlham Əliyevin yanvarın 12-də böyük Azərbaycan şairi Molla Pənah Vaqifin 300 illik yubileyinin keçirilməsi haqqında imzaladığı Sərəncamın icrasını təmin etmək məqsədilə Abşeron rayonunda silsilə tədbirlər keçirilir.
Növbəti belə tədbirlərdən biri Xırdalanın 2 nömrəli tam orta məktəbində məktəblilərin iştirakı ilə reallaşıb.
Tədbirdə məktəbin direktoru Ədalət Camalova çıxış edərək ədəbi məktəb yaratmış ölməz sənətkarın yaradıcılığından danışıb. Bildirib ki, bənzərsiz poeziya nümunələri yaradan Vaqif yaradıcılığı ilə milli ədəbiyyatımızın yeni istiqamətdə inkişafına təkan verib. Azərbaycan şeiri Vaqifin sayəsində tarixinin növbəti mərhələsinə qədəm qoyub. Onun klassik bədii fikir salnaməmizin parlaq səhifələrindən birini təşkil edən irsi müasir dövrdə də insanların əxlaqi-mənəvi kamilləşməsinə xidmət göstərir. Azərbaycan tarixinə, həmçinin siyasi xadim kimi daxil olan Vaqif taleyüklü məsələlərin həllində müdriklik və uzaqgörənlik nümayiş etdirib.
Diqqətə çatdırılıb ki, Vaqifin yaradıcılığı daim tədqiq obyektinə çevrilib, əsərləri kütləvi tirajla nəşr edilib və yubileyi təntənəli şəkildə keçirilib. 1982-ci il yanvarın 14-də ulu öndər Heydər Əliyevin bilavasitə təşəbbüsü və iştirakı ilə Azərbaycanın qədim mədəniyyət mərkəzi Şuşa şəhərində şairin məzarı üzərində ucaldılmış əzəmətli məqbərənin açılışı olub. 1992-ci il mayın 8-də Ermənistanın silahlı quldur dəstələri işğala məruz qoyduqları Şuşada bütün beynəlxalq hüquq normalarını pozaraq mədəniyyət nümunələrinə qarşı vandalizm aktları törədiblər və 600-ə yaxın tarixi-memarlıq abidəsini talayıb məhv etmiş, o cümlədən Xurşidbanu Natəvanın, Üzeyir Hacıbəylinin, Bülbülün ev-muzeylərini və Molla Pənah Vaqifin məqbərəsini dağıdıblar.
Qeyd edilib ki, Vaqif irsinin azərbaycançılıq məfkurəsi işığında daha dərindən araşdırılıb öyrənilməsi bu gün də aktuallığını qoruyan və həllini gözləyən mühüm məsələlərdəndir.
Toplantıda Abşeron RTŞ-nın əməkdaşı Elmira İsmayılova isə görkəmli söz ustadı Molla Pənah Vaqifin həyat və yaradıcılığı, şəxsiyyəti və ictimai fəaliyyəti barədə danışıb.
Yığıncaqda məktəbin şagirdləri Vaqifin şeirlərini səsləndiriblər. Şairin sözlərinə yazılmış mahnı və romanslar, eləcə də muğam və təsniflər, həmçinin aşıq havaları tamaşaçılar tərəfindən maraqla qarşılanıb.
Şamo Əliyev