VII Ümumrespublika uşaq yaradıcılıq müsabiqəsinin Abşeron rayonu üzrə qalibləri mükafatlandırılıb
Tarix:19-12-2017, 23:13
Dekabrın 19-da Abşeron rayon Heydər Əliyev Mərkəzində “Fövqəladə hallar uşaqların gözü ilə” mövzusunda Abşeron rayon məktəbliləri arasında keçirilmiş VII Ümumrespublika uşaq yaradıcılıq müsabiqəsi qaliblərinin mükafatlandırılması mərasimi olub.
Tədbirdə Fövqəladə Hallar Nazirliyi Sumqayıt Regional Mərkəzinin, Abşeron Rayon İcra Hakimiyyətinin, Abşeron rayon Təhsil şöbəsinin, Abşeron rayon Uşaq Gənclər İnkişaf Mərkəzinin, KİV-lərin nümayəndələri, məktəblərin direktor və müəllimləri, valideynlər iştirak ediblər.
Tədbirdə əvvəlcə Azərbaycan Respublikasının dövlət himni səsləndirilib.
Mərasimdə bildirilib ki, Sentyabr-dekabr ayları ərzində keçirilmiş müsabiqənin məqsədi uşaqlara təhlükəsiz həyat fəaliyyətinin əsaslarının öyrədilməsi və mədəniyyətinin formalaşdırılması, istedadlı uşaqların üzə çıxarılması və onlara dəstək verilməsi, yetişməkdə olan gənc nəslin vətənpərvərlik ruhunda tərbiyəsi, fövqəladə hal probleminə ictimaiyyətin diqqətinin yönəldilməsi olub.
Ölkənin bütün şəhər və rayonlarının ümumtəhsil məktəblərinin iştirak etdiyi respublika uşaq yaradıcılıq müsabiqəsi rəsm, plakat, əl işi, yanğın və qəza-xilasetmə texnikasının modeli, yumşaq oyuncaq nominasiyalarında məktəb, rayon və ümumrespublika birinciliyi mərhələləri üzrə keçirilib.
Sonra respublika uşaq yaradıcılıq müsabiqəsində ilk üç yeri tutmuş uşaqlara fəxri fərmanlar və qiymətli hədiyyələr təqdim olunub. Həmçinin rayon mərhələlərində ilk üç yeri tutmuş uşaqlara fəxri fərmanlar təqdim olunub.
Mükafatları Abşeron Rayon İcra Hakimiyyəti başçısının müavini Fuad Cəbrayılov, Fövqəladə Hallar Nazirliyi Sumqayıt Regional Mərkəzinin İctimaiyyətlə əlaqə və təbliğat sektorunun rəhbəri Emin Ramazanov, Abşeron rayon Təhsil şöbəsinin müdiri Nazilə Məmmədova, Uşaq Gənclər İnkişaf Mərkəzinin direktoru Aytən Rüstəmova və digərləri təqdim ediblər.