Abşeron rayonunda 31 dekabr – Dünya Azərbaycanlılarının Həmrəyliyi Günü və Yeni ilin gəlişi münasibətilə bayram tədbirlərinə start verilib.
Bu tədbirlər çərçivəsində 20 dekabr 2017-ci il tarixində Xırdalan şəhər 23 nömrəli körpələr evi-uşaq bağçasında uşaqlar üçün Yeni il şənliyi keçirilib.
Tədbirdə Abşeron rayon İcra Hakimiyyətinin əməkdaşları Elnarə Umayeva və Samirə İsmayılzadə, baxça müdirələri, həmcinin bağçanın körpə fidanlar iştirak ediblər.
Əvvəlcə bağçanın musiqi zalında körpə fidanların hazırladığı bayram konserti keçirilib. Uşaqların hazırladığı proqram qonaqlar tərəfindən maraqla qarşılanıb. Uşaqlardan ibarət rəqs qrupları, şən və hazırcavab balacalar çıxış edərək şeirlər və mahnılar səsləndiriblər.
Daha sonra çıxış edən E.Umayeva və S.İsmayılzadə körpə fidanları təbrik ediblər. İcra rəsmiləri uşaqların keyfiyyətli təhsil almalarının, yüksək səviyyəli tibbi xidmətlə təmin olunmalarının, onların sağlam mənəvi və sosial müdafiə mühitində böyümələrinin vacibliyini vurğulayıblar.
Tədbirdə çıxış edən bağçanın müdiri Aybəniz Sadıxova bildirib ki, ulu öndər Heydər Əliyevin müəllifi olduğu azərbaycançılıq ideologiyası nəinki azərbaycanlıları, ölkəmizdə yaşayan bütün xalqları, dünyada yaşayan soydaşlarımızı vahid ideya uğrunda birləşdirib. Əminliklə demək olar ki, bu gün dünyanın harasında yaşamasından asılı olmayaraq, hər bir azərbaycanlı Azərbaycan dövlətini özünün Vətəni hesab edir və ölkəmizi dünyada təbliğ edir. Azərbaycanlılar öz dövlətinin olmaları ilə qürur duyur və sahibi olduqları ölkəninin inkişafı üçün bütün addımları atır. Bunun nəticəsində də Azərbaycanın dünyanın ən dinamik inkişaf edən ölkələrindən birinə çevrilib.
Uşaqları “31 dekabr - Dünya Azərbaycanlılarının Həmrəyliyi günü” və “Yeni il bayramı” münasibətilə təbrik edən A.Sadıxova onlara can sağlığı, sevinc və heç zaman onların simalarından uşaq təbəssümünün, xoşbəxtliyinin əksik olmamasını arzulayıb.
Bağçanın həyətində davam etdirilən tədbirdə Şaxta baba və Qar qız maraqlı səhnəciklərlə, oyunlarla uşaqları şənləndiriblər. Rəngarəng kompozisiya ilə davam edən bayram tədbirində uşaqlar şeirlər söyləyib, şən mahnılar və rəqslər ifa ediblər.
Tural Kazımlı
