Xırdalan şəhər 17 saylı körpələr evi-uşaq bağçasında 20 Yanvar faciəsinə həsr olunmuş ana dili və bədii ədəbiyyat üzrə "Şəhidlər" mövzusunda məktəbəqədər hazırlıq qrupunun "açıq məşğələ"si keçirilib.
Simvolik olaraq hazırlanan “Məşəl Abidəsi” önünə tər qərənfillərin qoyulması ilə başlayan məşğələdə faciə qurbanlarının xatirəsi bir dəqiqəlik sükutla yad edilib. Bağçanın məktəbəqədər hazırlıq qrupunun uşaqları ilə "açıq məşğələ"ni Sevinc Seyfullayeva aparıb. Məşğələdə tərbiyəçi tərəfindən hadisənin tarixinə nəzər salınıb. Tərbiyəçi həmçinin məşğələ gedişində müxtəlif suallar verməklə uşaqların " 20 Yanvar faciəsi " haqqında biliklərini yoxlayıb.
Açıq məşğələdə 20 Yanvar faciəsindən və bağçanın məktəbəqədər hazırlıq qrupunun fidanlarının Şəhidlər Xiyabanına ziyarətindən bəhs edən videoçarx nümayiş olunub.
Daha sonra tədqiqatı aparmaq üçün qruplarla iş aparılıb. Körpə fidanlar 4 qrupa bölünüb, qrup daxilində lider seçiblər. Qruplara tapşırıq və iş vərəqləri paylanılıb. Məşğələdə uşaqlar onlara verilmiş tapşırıqlar icra edərək , vətənpərvərlik ruhunda böyüdüklərini nümayiş etdiriblər .
Körpələr evi uşaq bağçasının fidanları məşğələnin sonunda “20 Yanvar”-a həsr edilən şerlər söyləyib, vətənpərvərlik ruhunda manhılar ifa ediblər. Uşaqlar hazırladıqları səhnəcikdə qanlı gecənin dəhşətlərini nümayiş etdirməyə çalışıblar.
Sonda çıxış edən Abşeron RİH-in əməkdaşı Seymur Qasımov qeyd edib ki, Azərbaycanın azadlığı və ərazi bütövlüyü uğrunda mübarizə tarixinə qəhrəmanlıq səhifəsi kimi daxil olmuş 20 Yanvar faciəsi xalqımızın qan yaddaşından heç vaxt silinməyəcək. Bu faciə təkcə əvəzsiz itkiləri, nisgilləri, yaraları ilə deyil, həm də ibrət dərsləri ilə unudulmazdır və illər keçsə də, 20 Yanvar faciəsi qurbanlarının milli azadlıq mübarizəmizin tarixindəki qəhrəmanlıqları heç vaxt unudulmayacaq, müstəqil dövlətimizin möhkəmləndirilməsi naminə milli həmrəyliyi daha da inkişaf edəcək.
Şamo Əliyev