Yanvarın 18-də Xırdalan şəhər 15 saylı körpələr evi-uşaq bağçasında Azərbaycanın azadlıq və müstəqillik mübarizəsi tarixinə qəhrəmanlıq səhifəsi kimi yazılmış 20 Yanvar faciəsinin 28-ci ildönümünə həsr olunmuş anım tədbiri keçirildi.
Simvolik olaraq hazırlanan “Məşəl Abidəsi” önünə tər qərənfillərin qoyulması ilə başlayan anım tədbirində faciə qurbanlarının xatirəsi bir dəqiqəlik sükutla yad edildi.
Bağçanın müdiri Mətanət Novruzova toplantını açaraq bildirdi ki, bugünkü tədbir Azərbaycan xalqının azadlıq və müstəqillik mübarizə tarixinə qəhrəmanlıq səhifəsi kimi yazılmış 20 Yanvar faciəsinin 28-ci ildönümünə həsr olunub.
20 Yanvar faciəsinin tarixi və xalqımızın azadlıq mübarizəsi haqqında danışan M. Novruzova bildirdi ki, 20 Yanvar hadisələri Azərbaycan xalqının milli oyanışından, azadlıq və müstəqillik mücadiləsindən xəbər verən tarixi bir gerçəklik idi. Azərbaycana hərbi müdaxilə ilk növbədə milli azadlıq hərəkatını boğmağa, xalqımızı nəyin bahasına olursa-olsun əsarət altında saxlamağa yönəlmişdi.
Qeyd olundu ki, ümummilli lider Heydər Əliyev 20 Yanvar faciəsinin dünya ictimaiyyətinə çatdırılması istiqamətində mühüm səylər göstərmişdir. Ulu öndərin Azərbaycanın Moskvadakı daimi nümayəndəliyinə gələrək keçirdiyi mətbuat konfransının əhəmiyyətindən, şəhidlərin xatirəsinin əbədiləşdirilməsi istiqamətində dövlətin gördüyü işlərdən danışan bağçanın müdiri vurğuladı ki, məhz ümummilli lider Heydər Əliyevin təşəbbüsü ilə bu hadisəyə hüquqi-siyasi qiymət verilmişdir.
M. Novruzova 20 Yanvar faciəsi qurbanlarının xatirəsinin uca tutulduğunu, şəhid ailələrinin, əlil olmuş vətəndaşlarımızın dövlət tərəfindən hər cür diqqət və qayğı ilə əhatə olunduğunu, Azərbaycan Prezidenti İlham Əliyev tərəfindən bu insanlara daim diqqət göstərildiyini vurğuladı.
Tədbirdə çıxış edənlər də 20 Yanvar hadisələrindən ətraflı söhbət açdılar və faciənin dünya müstəvisində geniş işıqlandırılmasının vacibliyini qeyd etdilər.
Bağçanın uşaqları tərəfindən hazırlanmış "Qanlı yanvar gecəsi" adlı kompazisiya təqdim olundu, balaca fidanlar şerlər söylədi, 20 yanvar haqqında hadisələrdən bəhs edən faktları nümayiş etdirdilər.
Sonda Azərbaycan tarixini özündə əks etdirən səhnəciklər göstərildi.
Şamo Əliyev