20 Yanvar faciəsinin 28-ci ildönümü ilə əlaqədar Saray qəsəbə 19 saylı körpələr evi-uşaq bağçasında keçirilən tədbirdə faciə qurbanlarının əziz xatirəsi ehtiramla yad olunub.
20 Yanvar Azərbaycan xalqının müstəqillik yolunda mühüm mərhələ olduğunu vurğulayan bağçanın müdiri Məhbubə Sadıqova 28 il əvvəl Azərbaycanın azadlığı, suverenliyi arzusu ilə ayağa qalxmış dinc insanlara qarşı sovet imperiyasının silahlı birləşmələrinin törətdiyi cinayətlərdən danışıb. O, 20 Yanvar hadisəsini faciə kimi yox, milli tariximizin şanlı qəhrəmanlıq səhifələrindən biri kimi qiymətləndirib.
20 Yanvar faciəsinə ilk siyasi qiymətin məhz ümummilli lider Heydər Əliyev tərəfindən verildiyini vurğulayan M.Sadıqova qeyd edib ki, olduqca mürəkkəb bir vəziyyətdə olmasına, özünün və ailəsi üçün yaranan təhlükəyə baxmayaraq, Heydər Əliyev ailə üzvləri ilə birgə Azərbaycanın Moskvadakı daimi nümayəndəliyinə gələrək, Bakıda törədilən qırğınlara siyasi qiymət verilməsi, günahkarların cəzalandırılması tələbini bütün dünyaya bəyan etdi. Məhz Ulu Öndərin səyləri nəticəsində 20 Yanvar faciəsi barədə həqiqətlərin dünyaya çatdırılması işində mühüm irəliləyiş əldə olunub.
Anım tədbirində qanlı yanvar reallıqlarına həsr edilmiş video-çarx və uşaqların hazılrladıqları ədəbi-bədii kompozisiya da nümayiş etdirilib. Faciəni incəliyinə qədər təsvir edən poetik nümunələr, onların ustalıqla ifası dinləyicilərin qəlbini riqqətə gətirib, erməni faşizminə, rus ordusunun təcavüzünə nifrət hisslərini bir daha alovlandırıb.
Sonda körpə fidanlar bağçanın foyesindəki “Şəhidlərin xatirə güşəsi” önünə tər-qərənfil dəstələri düzərək, Ulu Tanrıdan onlara rəhmət diləyiblər.