Məşğələdə körpə fidanlara “suyun xassələri” tədris edilib. Əvvəlcə uşaqlar tərbiyəçinin suyun xassələri haqqında verdiyi sualları cavablandıraraq biliklərini nümayiş etdiriblər. Sonra tədqiqatı aparmaq üçün qruplarla iş aparılıb. Körpə fidanlar 2 qrupa bölünüb, qrup daxilində lider seçiblər. Qruplara tapşırıqlar verilib.
Mövzunun öyrənilməsi üçün motivasiya qurulub, uşaqlara qrup işində suyun fiziki xassələrinin dəyişməsi (şəffaflığı, rəngi, iyi, dadı və s.) barədə düşündürücü suallar verilib.
Qruplar öz işlərini təqdim etdikdən sonra tərbiyəçi müəllim tərəfindən onların işi müzakirə olunub.
Sonda çıxış edən bağçanın müdiri Aygün Məmmədova aparılan təlim-tərbiyə işinin nəticəsində uşaqların zəruri bilik və məlumatlara yiyələndiklərini, bağçada bir çox istiqamətlərdə müsbət təcrübə toplandığını qeyd edib, pedaqoji kollektivə fəaliyyətində uğurlar arzulayıb. A.Məmmədova qeyd edib ki, suya həyatın bütün anlarında xüsusi önəm verilir. Nə dadı, nə rəngi, nə də ki, qoxusu olan su dünyanın ən böyük sərvətidir. Su həyatın özüdür. Ona görə də deyirlər ki, canlı orqanizm canlı sudur. Su universal bir maddədir, həyat bu maddəsiz mümkün deyildir. Su bütün canlıların vacib tərkib hissəsidir. Bitkilər 90 faiz, insan bədəni isə təqribən 70 faiz sudan ibarətdir.
Daha sonra "Açıq məşğələ"nin dinləyicilərindən Abşeron RİH-in əməkdaşı Samirə İsmayılzadə və bir neçə bağça müdirəsi çıxış edərək "açıq məşğələ"nin yüksək səviyyədə keçdiyini, bağçada uşaqlarla geniş iş aparıldığını, nəticədə onlarda bu sahədə kifayət qədər aydın təsəvvürlər formalaşdığını qeyd edərək, bağçanın rəhbərliyinə, tədbirin təşkilində əməyi olanlara minnətdarlıqlarını bildiriblər.